O condutor dun turismo, de 57 anos de idade, faleceu durante a madrugada deste mércores tras chocar o vehículo que conducía contra un camión no municipio de Foz. O outro condutor implicado resultou ileso.
Segundo informou o 112, ao redor das 5,20 horas, unha chamada particular deu aviso dunha colisión entre un turismo e un camión tráiler na N-642, á altura do p.k 38,400.
O impacto entre ambos os vehículos provocou que a vítima quedase atrapada no interior do coche, polo que foi necesaria a intervención dos Bombeiros de Barreiros. Con todo, o 061 –tamén desprazado ao lugar– non puido facer nada por salvarlle a vida.
No operativo, tamén participaron os axentes da Garda Civil de Tráfico, así como os membros do GES de Cervo e voluntarios de Protección Civil da localidade.