O portavoz do PP no Concello de Foz, Javier Castiñeira, sinala nun comunicado que “unha vez máis temos que denunciar a falta de xestión do señor Cajoto”. Castiñeira sinala tamén que o goberno local presidido por Fran Cajoto “demostra unha vez máis a súa incompetencia á hora de xestionar as contas municipais”.
Castiñeira explicou que os orzamentos do concello chegaran tarde “e con dificilutades das que apercibiu o PP no propio pleno”. O portavoz popular sinala que había partidas que eran absolutamente insuficientes “debido a alta inflación e á suba dos custos; comparado con anos anteriores, entendíamos que serían insuficientes”.
O voceiro popular sinala que o goberno municipal agora “convócanos a un pleno extraordinario para aprobar unha modificación de crédito do orzamento, por case un 10%, 802.000 euros, cos que basicamente se suplementa as partidas que dicía o PP”. Castiñeira insistiu en que “o PP volveu ter razón cando dicía que os orzamentos que presentaba o señor Cajoto non eran reais, e non contemplaban a inflación”.