O Concello de Lourenzá asinou hoxe, mércores, un convenio co Bispado de Mondoñedo-Ferrol para rehabilitar o mosteiro de San Salvador cunha subvención concedida polo Goberno central.
A alcaldesa, Rocío López, explicou que “hoxe pola mañá asinamos un convenio de cesión co Bispado dunha parte do mosteiro de San Salvador; concretamente ese acordo inclúe o claustro maior, todas as dependencias situadas en torno a ese claustro principal”. A estas actuacións engádense o coñecido como Torreón dos Frades tamén e o Campo dos Bolos.
Con esta cesión o Concello poderá beneficiarse das subvencións dentro do Plan Nacional para o Turismo do Xacobeo, do Goberno central, polo cal ao mosteiro de San Salvador destínanse 2 millóns de euros.
A rexedora municipal engadiu que “este convenio que se asinou co Bispado ten unha duración de 29 anos e hoxe é para Lourenzá un día especial, histórico e para celebrar xa que sentamos as bases e colocamos esa primeira pedra que nos permitirá conseguir a rehabilitación dese patrimonio”.
Rocío López tamén anunciou que “o pasado martes, previo a esta firma, celebrouse un pleno extraordinario e urxente da corporación municipal, no que se tratou a aprobación do borrador deste convenio e hai que destacar que todos os grupos políticos (PSOE, PP e BNG) votamos a favor“. Por ese motivo, López salientou esa confluencia e preocupación que “temos todos os grupos por marcar esa folla de ruta e ter ese obxectivo común que é a rehabilitación do noso mosteiro”.
