O Concello de Lourenzá convocou o concurso de postais para escoller a que servirá como felicitación municipal e será publicada na páxina web e nas redes sociais do Concello.
O concelleiro de Cultura, Manuel Arango Ron, explica que este certame, dotado cun único premio de 100 euros e trofeo, “está dirixido aos escolares de Educación Infantil e Primaria do concello. O prazo de presentación das obras, que irán acompañadas dun sobre pechado cos datos persoais do autor/a, rematará o 17 de decembro e deben entregarse nas dependencias da Biblioteca Municipal”.
OBRADOIRO DE PINTURA
Veciñas de Lourenzá participaron no obradoiro denominado Elas tamén pintan: A creatividade como recurso harmónico de benestar natural, que tivo lugar onte á tarde e no que elaboraron un mural.
Esta actividade está promovida pola Concellería de Servizos Sociais e a edil Mercedes Dengra explica que “con este obradoiro conxunto queremos levar a cabo unha acción global nesa loita a prol da igualdade e da liberdade das mulleres”.
O domingo, día 28, ás 12 horas na Praza do Concello será a inauguración do mural e terá lugar a lectura dun manifesto, acto no que se reivindicarán os dereitos das mulleres e se rexeitará todo tipo de violencia machista. O Concello anima a toda a veciñanza a participar neste acto do domingo para visibilizar este problema que “aínda está tan presente na nosa sociedade e para poñerlle freo”.
