Afectados polo parque eólico de Sasdónigas, no municipio de Mondoñedo esixen que se cumpra a sentenza do Tribunal Supremo que anula os proxectos que serviron de base para a posta en funcionamento do polígono e rexeita os argumentos da empresa e da Xunta, ademais de considerar que esta debería de ter en conta a declaración de impacto ambiental.
Así o manifestaron, nunha comparecencia ante os medios de comunicación, o coordinador de afectados os parques eólicos na Asociación Galega de Consumidores e Usuarios (Acouga), Manuel Germade; e o avogado Borxa Colmenero, representante legal de Purificación Barreira, tamén presente no acto, xunto a outros afectados.
Colmenero esixiu que se cumpra a sentenza, ademais de denunciar a actitude “totalmente pasiva” da administración autonómica a pesar dunha condena firme desde xaneiro deste ano.
“INOPERANCIA” DA XUNTA
Durante o acto, Germade leu un manifesto dos veciños afectados no que denuncian que, en canto a responsabilidades, a resposta tanto do Concello de Mondoñedo como da Xunta é “ningunha, silencio e inoperancia”.
Critican que a Xunta “recorrese e se situase a favor da empresa sen ningún argumento sólido e contra os intereses dos veciños” e que o municipio adoptase “a postura do silencio absoluto ata o día de hoxe”.
Os afectados inciden, ademais, en que este parque eólico é “o negocio que máis diñeiro xera no municipio”, que está a funcionar “sen autorización administrativa” e “sen traer ningún beneficio a Mondoñedo nin á súa xente”.
Por outra banda, non descartaron levar a cabo “todas as actuacións xurídicas que se poidan derivar deste asunto para que sirva de precedente e non se volva a repetir noutros lugares”.
Neste sentido, coincidiron en sinalar que os danos causados en Sasdónigas por este parque, constituído por oito muíños e “que segue funcionando”, son “irreparables ou de difícil reparación”. “Moitas das afeccións non se poden restituír”, apostilaron
