IniciosociedadeA Semana Santa de Mondoñedo locirá tallas dos séculos XVII e XVIII

A Semana Santa de Mondoñedo locirá tallas dos séculos XVII e XVIII

A Xunta acolleu a presentación dunha cita que non se suspende "nunca" polo mal tempo e que implica na organización a arredor de 300 persoas

Publicada o

- Advertisement -

A Semana Santa de Mondoñedo, declarada de Interese Turístico Galego no 2017, celebrarase independentemente das condicións climáticas con procesións que mostrarán as tallas dos séculos XVII e XVIII que a “fan singular”.

A celebración foi presentada este venres na sede da Xunta de Galicia en Lugo polo campaneiro da catedral, membro da Orden Franciscana Seglar e representante da organización, Valentín Insua. Estivo acompañado da alcaldesa de Mondoñedo, Elena Candia, do delegado territorial da Administración autonómica, José Manuel Balseiro, e pola xefa territorial de Cultura, María José Gómez.

DESDE O SÉCULO XVI

Insua explicou que a Semana Santa mindoniense “ten as súas raíces no século XVI” e que se distingue doutras celebracións “porque mantén as mesmas imaxes desde os séculos XVII e XVIII”.

Durante a súa intervención, Insua precisou que na organización da Semana Santa participan entre 200 e 300 persoas, porque “implícase practicamente todo o pobo e non hai casa que quede á marxe”, o que fomenta o sentimento de unión na localidade.

A Semana Santa de Mondoñedo “é tradición, singularidade, participación e recollemento”, expuxo Insua, que lembrou que se celebran sete procesións e dous vía crucis, que percorren o casco histórico, pasando pola catedral, o Barrio dos Muíños e o Mosteiro dos Picos, do século XIV.

SE CHOVE, NA CATEDRAL

Candia, pola súa parte, lembrou que a Semana Santa de Mondoñedo “non se suspende nunca”, porque se as procesións non poden realizarse ao aire libre fanse no interior da catedral, que ten “unhas naves laterais moi amplas”.

“IMPULSO”

A rexedora destacou o impulso que supuxo para a Semana Santa de Mondoñedo o seu recoñecemento como Festa de Interese Turístico Galego, que permitiu promocionar a celebración en citas como Fitur.

Ademais, lembrou que a Semana Santa de Mondoñedo compartiu esta presentación nun encontro en Santiago de Compostela con celebracións tan importantes como as de Ferrol ou Viveiro.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...