O conselleiro de Cultura, Educación e Universidade, Román Rodríguez, presentou este venres o novo ciclo Comicamente, impulsado polas empresas Con de tres pés, Etiqueta Negra e Ainé Producións co apoio da Xunta de Galicia para levar o humor a 12 concellos da Comunidade desde finais de xullo a comezos de setembro, entre eles, a Mondoñedo.
Así o vindeiro 20 de agosto, a Alameda dos Remedios de Mondoñedo será o escenario para o humor de Celso Sanmartín, Ledicia Sola e Xosé A. Touriñán.
O proxecto, enmarcado na programación do Xacobeo 21-22, súmase ás iniciativas postas en marcha polo Goberno galego co obxectivo de contribuír á reactivación do sector cultural.
As entradas para asistir aos espectáculos póñense á venda este venres mesmo en ataquilla.com. O Carballiño, Vigo, Vilagarcía de Arousa, Sanxenxo, Ourense, Pontevedra, A Coruña, Santiago de Compostela, Lugo e Lalín son os outros concellos confirmados que van acoller, do 31 de xullo ao 4 de setembro, as actuacións previstas. A eles sumarase unha localidade máis, aínda por determinar. Todos os espectáculos serán en emprazamentos ao aire libre e cunhas moi coidadas postas en escena.