O Tribunal Supremo ditou dúas sentenzas que confirman a anulación dos proxectos que serviron de base para a posta en funcionamento dos parques eólicos Sasdónigas fase I e fase II, no concello lucense de Mondoñedo. O alto tribunal rexeitou os argumentos da empresa e considerou que a Xunta debía de ter en conta o contido da ‘Declaración de Impacto Ambiental’.
Así, o Supremo ratifica as sentenzas xa ditadas polo Tribunal Superior de Xustiza de Galicia que considerara que a división do parque en dúas fases era “artificial” xa que no “Parque Eólico Sasdónigas Fase II” deberíase de realizar a Declaración de Impacto Ambiental incluíndo a Fase I, posto que a fase II “carece dos elementos e equipamentos necesarios para ser considerada unha instalación independente da propia Fase I”.
Ao dividir o proxecto, o Supremo considera que “tampouco se tiveron en conta os efectos acumulativos de senllas fases do parque eólico en conxunto, o que comporta a nulidade da Declaración de Impacto Ambiental”. En todo caso, o alto tribunal tamén remarca que a DIA “non valorou de forma correcta elementos de especial protección, tales como o Camiño de Santiago, un xacemento arqueolóxico e dúas lagoas”.
Os demandantes iniciais estiman que “con estas dúas sentenzas o Tribunal Supremo senta xurisprudencia e obriga aos poderes públicos a observar con maior esixencia e pulcritude a xestión da análise de riscos ambientais acumulados que afectan o territorio sobre o que se asintan este tipo de instalacións”.
Ademais, nun comunicado, engaden que “non é admisible que a avaliación ambiental admita como posible un uso que conculque abertamente a Lei de Patrimonio Cultural de Galicia e a protección propia do Camiño de Santiago”.
