A Garda Civil, no marco da ‘Operación Indoor’, detivo no termo municipal de Ferreira do Valadouro a unha veciña desta localidade de 41 anos de idade como presunta autora dos delitos contra a saúde pública por unha plantación de cannabis con 290 xermolos e plantas e defraudación de fluído eléctrico.
Así o informou o Instituto Armado, que detallou que no desenvolvemento desta operación realizouse un rexistro domiciliario no que se localizou unha plantación de cannabis sativa, envasadora sen aire, básculas de precisión, sistemas de videovixilancia de seguridade perimetral e un sistema eléctrico profesional orientado ao cultivo intensivo.
Así mesmo, interviñéronse no operativo policial varios recipientes con marihuana, haxix e cocaína, así como 290 xermolos e plantas de cannabis. A muller detida foi posta este pasado martes a disposición do Xulgado de Primeira Instancia e Instrución número 1 de Mondoñedo, que decretou o seu ingreso nun centro penal.
