-Agora mesmo estás estudanto?

Si, estou en FP Administrativo e este é o meu último ano. Comecei o ano pasado e ademais era a primeira vez que se impartía no IES Perdouro, despois deste curso veñen os ciclos superiores.

-Naciches en Burela ou viñeches desde Cabo Verde?

Nacín en Cabo Verde e cheguei con sete anos a Burela. Non recordo moi ben como foron os primeiros anos aquí, os anos de adaptación. Si recordo estar en primaria cos meus compañeiros de agora así que coido terme adaptado ben.

-Cando remataches Primaria seguiches estudando ou comezaches a traballar?

Fixen até segundo da ESO e ía para terceiro, mais ofrecéronme facer este ciclo de administrativo.

-Es a primeira caboverdiana en facer este ciclo de FP?

Non, en total somos cinco compañeiras as que estamos facendo esta mesma formación.

-Formas parte do grupo Batuko Tabanka. Como empezaches dentro deste grupo?

Comecei cando estaba unha tía miña no grupo e ela foi quen me meteu. A min desde Cabo Verde gustábame participar en grupos, mais eu non tiña idea de que aquí ía facer o mesmo, non sabía da existencia de Batuko Tabanka.

-Que fas dentro do grupo?

Dentro do grupo temos como catro áreas. Eu estou en dúas. Tocamos un instrumento que se chama o pam-pam e logo están as que fan a chaveta. Eu fago a chaveta e tamén bailo. Hai outras que cantan e fan o pam-pam. Eu podo facer a chaveta e máis o pam-pam aínda que me dedico sobre todo á chaveta e ao baile.

A min desde Cabo Verde gustábame participar en grupos, mais eu non tiña idea de que aquí ía facer o mesmo

-Din que es a máis nova do grupo. Para ti por que a xente da túa idade non participa do grupo?

Non é algo que se aprenda de hoxe para mañá. É unha cousa á que debes estar afeita a facelo. Seguramente hai moitas persoas que lles gustaría mais non conseguen facelo.

-Tes viaxado coas túas colegas de Batuko Tabanka?

Si, xa estivemos practicamente por toda Galicia e tamén por algúns lugares fóra de aquí.

-Sentiches algunha vez que o grupo era moi ben acollido nalgún lugar en especial?

Despois dun concerto que fixeramos no festival Osa do Mar aquí en Burela, houbo moitas chamadas para ir actuar a diferentes lugares. Logo chegou a pandemia e houbo unha freada. Mais este pasado martes día sete de febreiro foi a nosa primeira actuación fóra de Burela, en Lugo concretamente, a primeira actuación de 2023.

-Tamén colaboras en Radio Burela, no programa de Proxecto Neo. Como foi que quixeches participar nesta experiencia?

Primeiro entrevistárame Bernardo Penabade sobre Batuko. Logo había unha praza libre para vicedirectora, preguntáronme se me gustaría entrar e dixen “si”, pois porque quería probar.

-Cales son as túas tarefas dentro do programa?

Fago a introdución e este pasado mércores foi a primeira entrevista que fixen xunto con Bernardo. Entrevistamos a unha rapaza investigadora da Coruña.

-Facer estes programas estate animando a quereres seguir co proxecto radiofónico?

Si, porque en realidade non pensei en que ía pasalo ben dentro desta iniciativa. Pensei que sería chegar, facer o programa e listo. Mais vin como te reciben e realmente, sénteste como na casa.

había unha praza libre para vicedirectora, preguntáronme se me gustaría entrar e dixen “si”, pois porque quería probar

-Gustaríache seguir facendo máis programas?

Si, se o ano que vén sigo aquí, quero seguir facendo programas porque me gusta moito.

-Animas a outros mozos e mozas da comunidade caboverdiana para faceren actividades como fas ti?

Sempre intento dar exemplo para os máis pequenos, mais que me fagan caso xa é outra cousa, aínda así intento que se movan.

-Ves o teu futuro en Burela o quererías ir a outro lugar?

Para o ano que vén tiña pensado, se podo, facer o ciclo de enfermaría na Coruña. Aínda que non sei como irán as cousas.

-Supoño que te animarán desde a túa familia.

Si, si que me animan e á parte, o meu irmán tamén estuda alí na Coruña.

-Para acabar, cres que existe un bo entendemento entre as comunidades que compoñen Burela?

Para min os caboverdianos estamos ben integrados.