-Cales son as expectativas de participación como cofrades nos diferentes pasos de Viveiro e tamén se esperan que o tempo acompañe?

Temos unhas expectativas moi boas porque cremos que vai haber máis xente que nunca en Viveiro. Iso cónstamente polo que me contan sobre ocupación hoteleira e a cantidade de persoas que chegarán para participar, por tanto son moi optimista con esta Semana Santa. Vai haber máis cofrades que noutras edicións, mesmo máis nenos para acompañar algún paso, por tanto, estamos moi contentos.

-Cantas irmandades compoñen a Semana Santa viveirense?

Agora mesmo son oito irmandades.

-Como é a orde que seguen os diferentes pasos para saír en procesión?

O sábado sairá unha procesión que é a Terceira Orde; o domingo será Borriquita que é da parroquia, non é de ningunha confraría; pola tarde sairá o Ecce Homo, da Terceira Orde. Debemos apuntar que a Terceira Orde é a confraría máis antiga e a que máis procesións realiza. Despois o martes hai un Via Crucis de mulleres organizado pola Irmandade de Mulleres da Santa Cruz. O mércores será o Via Crucis de homes, organizado de maneira conxunta pola parroquia coa Irmandade das Sete Palabras. O xoves, un dos días fortes, temos ás sete e media a Procesión da Cea, realizada pola Orde Terceira. Ás dez da noite teremos O Prendemento, organizado polo Prendemento con outra confraría, O Nazareno dos de Fóra. Na madrugada do venres ao sábado sae a Misericordia, coa confraría do mesmo nome.

-Que coidados realizan durante o resto do ano para coidar os pasos que procesionan nestes días?

Hoxe en día temos todo exposto. Aquilo que non está dentro das igrexas está no museo, aínda así, se algún paso sofre algún dano, temos un restaurador de man que xa vén para arranxar ese dano. Tamén usamos algún produto para mantelos limpos e conservados. Tamén é certo que cada confraría faise cargo do seu patrimonio.

-Onde está situado o Museo das Confrarías?

No claustro do antigo convento de San Francisco. A entrada é libre.

-Que tipo de xente visita este museo?

Moitos son grupos que veñen de fóra sobre todo grupos de xente xubilada e grupos de escolares.

-Ten a impresión que a Semana Santa de Viveiro está collendo renome fóra de Galicia?

Penso que si, porque desde o seu nomeamento dentro do Interese Turístico Internacional, se cadra levou un impulso moi grande. Agora estamos na Rede Europea de Celebracións de Semana Santa e isto nos dá maior presenza. Tamén penso que dentro de Viveiro hai moito máis apoio á Semana Santa porque participa máis xente e desde logo iso déixanos moi satisfeitos.

-Hai algún elemento que distinga a Semana Santa de Viveiro doutras?

Creo que si, porque tanto o Encontro, o Desencravo e Os Caladiños, que son as máis antigas, xa organizadas polos frades dominicos e franciscanos, son particulares pois no resto de España non hai como aquí imaxes articuladas dos séculos XV e XVI. Ese tipo de imaxe conservouse nesta vila mais no resto de España parece que non. Ese patrimonio de pasos con figuras articuladas é algo que nos distingue dos demais.

-Sábese o nome dalgún dos escultores que deixaron o seu facer nas figuras de Viveiro?

As máis antigas son anónimas, mais hai imaxes como a Cea, a Verónica e o San Xoán feitas no século XVIII, obra dun escultor chamado Juan Sarmiento que ademais era carpinteiro de ribeira en San Cibrao. Logo, durante o século XX o máis coñecido era José Rivas, que foi de Riotorto, estivo na escola compostelana e logo fíxose moi coñecido en Viveiro por realizar os pasos máis grandes no seu taller.

-Cando partician en encontros entre asociacións e representantes de cidades europeas que organizan a Semana Santa, cal é a cualificación que lle dan ao patrimonio viveirense?

É moi boa, porque como dixen, temos imaxinería do século XV ao XXI. Algunhas teñen un valor incalculable. Agora no século XXI, viñeron escultores moi coñecidos en España desde Córdoba, todo isto axuda a darlle un gran valor ao patrimonio que hai en Viveiro.

-Teñen pensado realizar algunha actividade de cara a mellorar a conservación dos pasos?

A nosa intención é mellorar a exposición, un museo climatizado para que a imaxinería non sufra e esa é a nosa intención, mellorar pouco a pouco a exposición permanente e cunha mellor conservación.

-En total cantas persoas poden participar como cofrades ou costaleiros durante estes días?

Calculo que sobre 5.000 persoas máis ou menos. Si porque, por exemplo, hai unha procesión na que só nesa van 1.600 persoas. Sumando todas poden dar as 5.000 persoas.

-E son todas de Viveiro?

Non, non, tamén vén moita xente de fóra que quere participar. Persoas que veranean aquí, fillos de viveirenses que viven fóra, xente de fóra que mercou casas aquí e gustan de participar.

-Que bandas fan o acompañamento musical ás procesións?

Hai varias, temos a Banda Municipal de Viveiro, temos a Banda Tau fundada en 1976, temos a Banda da Misericordia e a Banda Naval. Logo cada confraría ten a súa banda de tambores.