O documental ‘Xove, Democracia Nuclear’, sobre a mobilización antinuclear na Mariña lucense en novembro de 1973 cando se fixo público, a través dos medios de comunicación, o proxecto de construción dunha central nuclear no termo municipal de Xove, iniciou a súa gravación.
Este proxecto forma parte da iniciativa a nivel estatal ‘Democracia Nuclear’, dirixida polo xornalista Pedro Lechuga Mallo, que está a recuperar os testemuños das persoas que na década do setenta protagonizaron as mobilizacións antinucleares xurdidas en diferentes zonas de España.
Lechuga Mallo asegurou nun comunicado que este documental “servirá para recuperar os testemuños de moitos dos protagonistas da mobilización antinuclear”, así como “ofrecerá diferentes ángulos dunha mesma historia”.
O director sinalou a importancia deste tipo de proxectos, xa que “non se pode permitir como sociedade perder os testemuños das persoas que protagonizaron parte da historia”. Ademais do propio Lechuga Mallo, forma parte deste traballo, que se está gravando de maneira íntegra en galego, a produtora ‘Como unha brizna’. Así, conta tamén coa colaboración da Asociación de Prensa de Lugo e a xornalista lucense Dores Cela.
