A Real Filharmonía de Galicia (RFG) inaugurará a décima edición do ‘Festival Bal y Gay’ este xoves 10 de agosto no Teatro Pastor Díaz de Viveiro (20:30 horas) con todas as entradas esgotadas. A prestixiosa orquestra, emblema cultural da comunidade galega con máis de 25 anos de historia, estará dirixida por Maximino Zumalave con Adriana Winkler como concertino e 45 músicos sobre o escenario. A RFG, que abrirá o festival por cuarto ano consecutivo tras debutar en 2020, iniciará a súa actuación coa ‘Oda a Don Quixote’ de Xesús Bal y Gay como homenaxe á figura do crítico, musicólogo, compositor e profesor lucense. Posteriormente, ofrecerá ‘Pulcinella (suite, rev. 1949)’ de Igor Stravinsky e a ‘Sinfonía nº.40 en Sol Menor’ de Wolfgang Amadeus Mozart como obra final do programa. Será a primeira das 14 actuacións previstas ata o 24 de agosto no evento, referente de música clásica en España polas súas excelentes propostas artísticas en espazos emblemáticos da Mariña. Preto de 4.000 espectadores acudirán aos seus concertos nas próximas dúas semanas.

“O Bal y Gay é un dos referentes actuais do panorama galego xa consolidado. O que lle fai especial é que involucra non soamente a unha localidade, senón a toda a comarca. Ademais, ofrece a posibilidade de actuar nun espazo hermosísimo como o Teatro Pastor Díaz de Viveiro”, afirmou Sabela García Fonte, directora técnica da Real Filharmonía de Galicia. A RFG inaugurará por cuarto ano consecutivo o festival tras a súa primeira presenza en 2020, edición que supuxo o inicio dos concertos sinfónicos no evento. “Unha das misións fundamentais da RFG é difundir a música en todo o territorio ao que dá servizo. Por iso é moi importante para nós participar nos festivais musicais que dinamizan Galicia de maneira tan extraordinaria, como é o caso do Bal y Gay. Permítenos chegar a pequenas localidades ás que, doutro xeito, sería moi complicado. Unha orquestra do século XXI ten que ser aberta, diversa e sensible ao que sucede no mundo”, engadiu García Fonte.