O Concello de Viveiro deu a coñecer a súa programación cultural para o primeiro trimestre do ano, entre a que destaca un monólogo de Carlos Blanco ou un concerto para todos os públicos de Magín Blanco.
No espectáculo ‘Os meus mellores monólogos‘, Blanco repasará o 9 de marzo, a partir das 20.30 horas, as súas historias máis coñecidas despois de décadas a exercer a arte do ‘stand-up’.
Pola súa banda, Blanco presentará o sábado 16 -desde as 18.00 horas- un show musical adicado ao público infantil, ‘A nena e o grilo máis aló‘.
FEBREIRO
O primeiro dos espectáculos programados pola concellería de cultura é a obra ‘A canción elefante‘, de Redrum Teatro, que se celebrará o 9 de febreiro. A actuación, dirixida ao público adulto, comezará ás 20.30 horas.
Os máis pequenos poderán desfrutar das obras ‘Frankenstein. No soy un monstruo‘, de Pata Teatro, e Patapatúm, de Elefante Elegante, os días 16 e 23 de febreiro, respectivamente, a partir das 18.00 horas.
En marzo, Contraproduccións recreará a obra ‘Commedia‘, tamén para adultos. Comezará ás 20.30 horas, o sábado 23.
MAIO
Finalmente, en maio haberá dúas obras teatrais que terán lugar no primeiro fin de semana dese mes. Para o sábado 4, ás 20.30 horas, está prevista a representación de ‘Castrapo‘, de Os Náufragos.
O domingo 5, ás 19.30 horas, comezará a recreación de ‘Sainetes e poesía escénica‘, que porá en escea o grupo local Andanzas.
DÍA DA PAZ
O Concello de Viveiro unirase este mércores, 30 de xaneiro, á celebración do Día escolar da non violencia e da paz, que se celebra desde 1964.
A iniciativa xurde da colaboración entre a concellería de educación, os colexios de infantil e primaria de Viveiro e as Asociacións Beiras de Viveiro e Centro Comercial Histórico de Viveiro.
OS LOCAIS DE COVAS E VIVEIRO EXPORÁN OS MURAIS PACIFISTAS FEITOS POLO ALUMNADO DOS CENTROS EDUCATIVOS
O día 30 exporanse nos establecementos asociados de Covas e Viveiro, así como no Concello os murais feitos polos alumnos e alumnas de infantil e primaria da EEI San Roque, CEP Lois Tobío, CEIP Covas, CEIP Santa Rita de Galdo e CPR Landro para conmemorar esta data.
