O Concello de Burela presentou a súa programación cultural para o mes de abril, que inclúe varias representacións teatrais e unha proxección de cinema infantil.

O venres, día 5, a compañía Volta e Dálle presentará a obra ‘Falar por falar‘. Trátase dun traballo de narración oral do vicedense Pepe Penabade e Carlos Santiago sobre a lingua galega. O espectáculo comezará ás 21.00 horas e o prezo da entrada será de catro euros.

O 12 de abril, a compañía MalaSombra Producións recreará a obra ‘O caso é ter saúde‘, que parte dunha historia sobre a lotaría para reflexionar sobre a ambición. Tamén neste caso a representación dará comezo ás 21.00 horas e o prezo da entrada ascenderá a catro euros.

O 27 de abril, sábado, haberá de novo teatro coa obra ‘Saaabor‘, interpretada por Cultura Activa. A peza comezará ás 18.00 horas, cun custo de 2,5 euros por localidade.

No tocante ao cinema para nenos, haberá unha nova sesión o día 21, domingo, a partir das 18.30 horas, cando se proxectará unha película aínda por determinar. 

O Concello de Burela organiza estas actividades coa colaboración da Xunta de Galicia, Agadic e a Rede Galega de Teatros e Auditorios. A programación desenvolverase integramente na casa da cultura.

SEMANA SANTA

A axenda cultural do Concello burelao completarase cos actos da Semana Santa, que se celebrarán dos días 14 ao 21 de abril.