Mondoñedo é poesía celebrará á súa sexta edición o primeiro de maio, dentro dos festexos das Feiras e Festas das Quendas, que se celebran desde 1541.
Nesta edición, a organización homenaxeará a Manuel Ledo Bermúdez “O Pallarego” (Mondoñedo, 1899-1964), o músico-barbeiro que recuperou canda Cunqueiro, xunto a outros ilustres mindonienses como Vidarte ou Díaz Jácome, a tradición dos maios nos anos da segunda República.
A comitiva que recitará polas rúas partirá ás 17.00 horas da Finca da Loura, ao pé da casa natal do Pallarego no barrio dos Muíños. Particparán na homenaxe ao músico e activista cultural Remedios Ledo e alumnado dos centros educativos e da escola de música.
Alexandre Fernández Peón (segundo premio Díaz Jácome 2018), Laura López (terceiro premio Díaz Jácome 2018) e Esperanza Pérez participarán no recital polas rúas.
ACTO NO PASCUAL VEIGA
Ás 18.30 horas comezará o acto poético no auditorio Pascual Veiga, onde soarán os versos de Martiño Maseda (primeiro premio Leiras Pulpeiro 2018), Alberte Momán (segundo premio Leiras Pulpeiro 2018), Olga Novo e Antón Reixa. A música correrá a cargo de Lino Rico (con Juan Carlos, Fajardo e David) e A Banda da Loba. Presentará Montserrat González Álvarez.
Ademais, haberá unha exposición de poesía na recepción do Auditorio Pascual Veiga. Tamén se poderá ver unha montaxe foto-poética con poemas elaborados polo alumnado do IES San Rosendo inspirados en obras de artistas mindonienses e mariñaos.
