EFE. Máis dun centenar de viñetas ambientais conforman ‘Houston, tenéis un problema‘, antoloxía gráfica do xornalista e ilustrador ribadense Juan López Rico, quen defende o humor como ferramenta para concienciar sobre o “gravísimo risco que afrontamos se non damos un xiro radical á nosa relación coa natureza”.

“Non se trata de banalizar os temas ambientais, senón de utilizar o humor para facernos reflexionar e achegar os problemas aos cidadáns dun xeito máis atractivo e eficaz”, explicou López Rico (Ribadeo, 1955) en entrevista con Efe.

Cambio climático, contaminación, enerxía, urbanismo desmedido, incendios forestais, lixo e reciclaxe ou política ambiental e como os partidos abordan estes problemas son algunhas das cuestións que López -como asina as súas viñetas- desgrana nas 134 páxinas deste libro a través dos seus personaxes habituais: os amigos na barra do bar, as señoras, o adiñeirado sen escrúpulos…

Editado por Silsania Books e cun prólogo de Arturo Larena, a capa anticipa algúns dos asuntos que o autor busca significar cos seus debuxos, ao mostrarnos a Terra envolta nunha bolsa de plástico xigante e orbitando arredor dun cohete que transmite esta mensaxe á base: “¡Houston, tenéis un problema!”.

López Rico sinala que as cuestións nas que afonda son “as que están nos xornais, nas conversas da casa ou nas charlas tomando un viño. A vida. Aínda que penso que o tema máis recurrente ata o de agora foi a política. Os políticos dan moito xogo e hai veces que non tes nada que achegar. Danche a viñeta feita”, agrega.

Non dubida cando se lle pregunta polo principal reto ambiental: o cambio climático, o “máis preocupante como fenómeno global xa que case poderíamos dicir que moitos outros dos problemas que temos ou non esperan nos próximos tempos, son consencuencia do quecemento do planeta“.

EVITAR “UN DESASTRE ANUNCIADO”

Pero para afrontalo e tomar decisións, hai que coñecer, ter información, e humor “pode chamar a atención sobre a situación do noso medioambiente dun xeito máis atractiva, pode chegar a máis persoas que un estudo científico de máis difícil comprensión, pode fixar de maneira máis eficaz na conciencia das persoas a necesidade de non ser meros espectadores dun desastre anunciado“, asevera o xornalista e ex delegado e Efe en Galicia.

O xornalismo levouno á ilustración, na que empezou de xeito autodidacta, aínda que leva “practicamente toda a vida debuxando. É probable tamén que veña algo de familia. Meu pai debuxaba, teño un irmán arquitecto e outro fixo Belas Artes“, explica.

Debuxou as súas primeiras viñetas para prensa nos 80, publicando primeiro en El Correo Gallego e logo no Galicia Hoxe, expón o autor, que expresa a súa admiración polos “humoristas que desenvolveron a súa actividade no tardofranquismo a transición e en revistas como La Codorniz ou Hermano Lobo“.