O grupo de música tradicional Tumba e Dálle presentará o vindeiro domingo o seu primeiro videoclip, da peza ‘A xota mariñá‘. A presentación celebrarase desde as 21.15 horas na praza de Rinlo, localidade na que foi rodada a práctica totalidade da gravación.
O grupo, que iniciou a súa traxectoria no 2010, ten por entregar o seu primeiro traballo discográfico e busca un oco no panorama musical con este videoclip. “Estamos moi satisfeitos co resultado final e agradecemos a asociacións e entidades que nos axudaron na organización da presentación”, sinalou a banda nun comunicado.
MÚSICA EN DIRECTO E SORPRESAS
Ademais da proxección da obra, na presentación haberá conversas con protagonistas directos e indirectos do videoclip, música en directo e varias sorpresas. Anxo Rivas, de Radio Foz, conducirá o acto.
