O Concello de Viveiro, en colaboración coa Xunta de Galicia, impulsa Sábados de contos, un programa gratuíto de obradoiros e contacontos que se celebrará durante o mes de setembro. Todas as actividades serán ás 12.00 horas na biblioteca municipal.
O vindeiro sábado inaugura o programa ‘Érase dúas veces a Bela e a Besta‘, a cargo de Xogando nas Nubes. Os asistentes participarán dun obradoiro de teatriño de sombras chinesas e adaptará o conto de ‘A Bela e a Besta‘, cambiándolle o rol á protagonista para reflexionar sobre os valores e as ideas de xénero. A entrada será de balde, ata completar aforo.
DÍA 15
O día 15 será a quenda de Raquel Queizás, con ‘Romaría‘. A Avoa Tareixa achegará ao público infantil as lendas de Galicia, sen deixar de tratar temas de plena actualidade.
DÍA 22
O sábado 22 haberá unha narración ilustrada da colección de libros Polo Correo do Vento. O espectáculo, titulado ‘Meiga Nova, metade anxo, metade marisco‘, está baseado na biografía da artista viveirense Maruja Mallo, e os pícaros asistentes realizarán unha caricatura da pintora.
DÍA 29
O día 29, A Tropa de Trapo pechará o programa con ‘Contos de nenas grandes e pequenas‘.
Este ciclo aspira a incentivar a lectura, a creación artístico-literaria, a comunicación en galego e a transmisión de valores como son a igualdade de xénero, o respecto mutuo ou o coidado do medio ambiente.
