A sala multiusos do Concello de Viveiro acolleu este venres o concerto do obradoiro de canto coral do Conservatorio Profesional de Música Municipal, enmarcado na programación do goberno local para celebrar o Día das Letras Galegas.

O evento, no que se enxalzou a figura de Xela Arias, escritora á que se lle dedica a data este 2021, contou coa participación dos intérpretes Rosa Lage e Víctor Rolle. Mentres recitaban, estiveron acompañados polo músico Lino Rico, profesor ademais do Conservatorio Profesional de Música de Viveiro.

“Dende o Concello de Viveiro agradécese a implicación dos intérpretes e participantes, así como do profesorado do conservatorio e de todos os asistentes, que contribuíron a reivindicar a figura da escritora”, apuntan desde a institución local nun comunicado.

Por outra banda, o concerto da Banda de Música Municipal de Ribadeo, quedou aprazado por mor da chuvia. O director da formación, David Ballester, explicou que intentarán que se celebre nunha data próxima. A actuación ía ter lugar no campo de herba artificial do Ceip Gregorio Sanz.