O Concello de Burela programou ‘O Crebanoces‘, o célebre ballet clásico de Piotr Ilich Tchaikovski, para o domingo 23 de decembro. Os interesados en acudir ao espectáculo poderán adquirir as entradas a partir do vindeiro luns.
O Gran Ballet de Kiev, en Ucraína, encargarase de interpretar a obra, que comezará ás 19.00 horas no auditorio da casa da cultura.
Estrenada no 1892, ‘O Crebanoces’ é un conto de fadas que narra unha historia baseada no relato infantil de Ernst Hoffman. Relacionada co Nadal, a trama comeza cando unha nena, Marie Stahlbaum, recibe un xoguete que cobrará vida.
Logo de albergar ‘O Lago dos cisnes‘ no 2017, será a segunda vez que Burela acolle un evento destas características, segundo espuxo o concelleiro de cultura, José Díaz.
O edil espera que “se supere o nivel do ano pasado, porque a formación ucraína quizais estea por riba do Ballet de Moldavia que actuou no 2017. Trátase de bailaríns moi coñecidos e que actúan en países como Suíza, Italia ou Bruxelas”, precisou.
ENTRADAS
As entradas estarán á venta desde o luns en ataquilla.com, con butacas numeradas tanto no anfiteatro 1 como en platea. Os prezos ascenderán a 18 euros en platea e 15 euros no anfiteatro 1.
Das 800 localidades, a organización reservará 80 tiques para quenes compren o seu pase o mesmo o día do espectáculo.
Díaz considera que o evento ten potencial para atraer xente “de toda a comarca, do occidente de Asturias e de Lugo”.
