-Como naceu a iniciativa do Festival Aturuxo de Bravos?
Naceu en 2012 polas inquietudes dos mozos e mozas da parroquia que sen residiren todo o ano na parroquia, si se sentían moi vinculados coa parroquia pois os pais naceran aquí ou tiñan as súas raíces en Bravos. Primeiramente Juan e Sabela, tiveron a idea, comentárona cos compañeiros e de aí para adiante. Nós encantados de que probasen cunha primeira edición alá en 2012.
-Estamos entón diante do décimo aniversario do Aturuxo. Hai algunha sorpresa para esta edición?
Si, porque lle demos un gan xiro porque o festival medra. Antes organizábase un pre-Aturuxo cunha foliada e este ano xa está integrada na programación oficial. Entón xa temos festa e acampada libre desde o venres 28 de xullo. Outra novidade vai ser a Feira de Artesanía e Produto galego e de aí a seguir medrando e facendo cousas.
-Que tipo de música podemos oír no Aturuxo?
Seguimos coa liña de ter música para todos os públicos, desde música máis melódica, pasando por hardrock e entretemento para nenos. É un festival interxeracional e para iso contamos o venres cos Festicultores, Os do Cómbaro van facer a foliada que esperamos dure até altas horas da madrugada.
novidade vai ser a Feira de Artesanía e Produto galego e de aí a seguir medrando e facendo cousas
-Ven que o número de asistencia aumenta ano a ano ou hai un público fiel que mantén un nivel de asistencia determinado?
Durante este tempo fomos creando un público fiel desde o minuto un a quen rememoramos durante a presentación do programa deste ano. Tentando facer un resumo, os que viñan durante a súa mocidade agora veñen coas familias incluídos nenos e nenas. E desde logo que se sente cada ano un aumento de asistencia, mesmo con xente chegada de máis lonxe. Isto demostra que paga a pena mantelo e seguir adiante.
-O festival tamén se desenvolve nunha contorna natural. Como se consegue que o público sexa respectuoso co medio?
A xente é máis respectuosa do que moitos pensamos. Levamos dez anos de edición e nunca houbo problemas dese tipo e coa acampada a xente é moi coidadosa. Tamén lle facilitamos ao público onde tirar o lixo e outras demandas. En dez anos de edición podemos dar as grazas á asistencia polo seu comportamento. Logo cando limpamos vemos que só o temos que facer no lugar do festival.
-Cando se presentou o festival ao Concello de Ourol, cal foi a reacción?
Sempre foi de apoio desde o primeiro momento. Segundo aumentaba a colaboración así aumentaba o Aturuxo. Hoxe por hoxe non concebimos o festival non só co apoio do Concello senón tamén doutras organizacións, pois non debemos esquecer que todo isto naceu ao son da Asociación de Veciños, quen arrimaron o ombro para sacar isto adiante. Daquela aínda non existía a Asociación Cultural, naceu despois.
os que viñan durante a súa mocidade agora veñen coas familias incluídos nenos e nenas
-Quen son as dúas persoas que deron o primeiro paso para este festival?
Sabela, que formaba parte do grupo Muxarega, un dos primeiros en participar logo participou en Operación Triunfo. Juan é cámara de televisión e gustan dos festivais como os seus amigos.
-Que obxectivos lle gustaría ver cumpridos no futuro?
Os obxectivos básicos están cuberto. O festival estase consolidando e o que nos gustaría era ter o recoñecemento de Interese Turístico Galego e logo pasar ao nacional.
