O Concello de Barreiros convoca o I Certame de teatro amador “ConVida no Rural” que terá lugar no mes de outubro en Barreiros. Trátase dun certame que terá lugar os sábados e domingos do mes de outubro alternando o centro sociocultural de San Cosme e os Colexios Vellos de San Miguel. No mesmo empregarase preferentemente a lingua galega e admítese calquera tipo de xénero.
Os grupos interesados en participar deberán inscribirse nas oficinas municipais do Concello de Barreiros ou ben enviado un correo a dinamizacion@concellodebarreiros.gal coa documentación que se require nas bases que están publicadas na web municipal www.concellodebarreiros.gal antes do 6 de setembro de 2022.
O día 1 de novembro, nos Colexios Vellos de San Miguel de Reinante, terá lugar a gala de premiación onde se entregarán 600€ máis trofeo como primeiro premio e 200€ máis trofeo como segundo premio. Ademais dos referidos premios galardoarase con trofeos ás mellores actrices e actores protagonistas e de reparto. Ese día, o grupo de teatro C.C. Ollomao, pechará o certame cunha representación teatral que non entrará a concurso.
