Burela acollerá do 3 ao 7 de abril a cuarta Semana do Deporte, que organiza o Concello.
Entre o programa de actividades haberá talleres de iniciación ao atletismo para crianzas e ao xadrez para adultos, un clínic de pádel e outro de baloncesto no que participarán xogadores do Obradoiro, así como charlas e unha ruta de sendeirismo.
MÉRCORES
A cuarta Semana do Deporte de Burela comezará o mércores, 3 de abril, cun taller de iniciación ao atletismo, organizado pola Federación Galega da especialidade, que se desenvolverán nos colexios Vista Alegre e Virxe do Carme.
Ese mesmo día celebrarase un clínic de baloncesto, coa visita de dous xogadores do Obradoiro, equipo da Liga ACB, ás escolas do CB Burela, e que se desenrolará no pavillón Vista Alegre.
XOVES
O xoves 4 terá lugar un circuíto deportivo polas escolas infantís coa visita do CD Burela FS Pescados Rubén, e ás 20.00 horas, no salón de conferencias, haberá unha charla titulada ‘Muller e Deporte‘, na que participarán Pili Neira (fundadora de MUDEGA-Mulleres Deportistas Galegas), Patricia González Mota “Peque” (xogadora do CD Burela FS), Tania Fonte (árbitro asistente internacional de fútbol) e Carla Trillo (atleta local).
PARTICIPARÁN NO COLOQUIO PEQUE, A ATLETA CARLA TRILLO, A ÁRBITRO TANIA FONTE OU PILI NEIRA, FUNDADORA DE MUDEGA
A mesa redonda será moderada por Suso Vázquez, vicepresidente da Federación Galega de Atletismo.
VENRES
O venres 5, a partir das 20.00 horas no pavillón Vista Alegre, haberá unha charla sobre primeiros auxilios no deporte a cargo de Camilo Vázquez, do 061, organizada por Semes Galicia.
SÁBADO
O sábado celebrarase un clínic de pádel a partir das 12.00 horas no Activity Center. Tamén haberá a partir das 16.00 horas, na praza da Mariña, un circuíto infantil de BTT, organizado por Cerezo Bikes.
DOMINGO
A IV Semana do Deporte de Burela rematará o domingo, 7 de abril, coa ruta circular de sendeirismo, que sairá de Capitanía Marítima ás 10.00 horas, organizada pola asociación Pasada das Cabras.
O ÚLTIMO DÍA CUBRIRASE A RUTA CIRCULAR DE SENDEIRISMO, HABILITADA POLO CONCELLO E CUNHA DISTANCIA DE 16 QUILÓMETROS
Ademais haberá un taller de iniciación ao xadrez para adultos, a partir das 11.00 horas, no salón de conferencias, organizado polo clube de xadrez Reyes y Peones. Tamén o domingo terá lugar o torneo desta mesma entidade, que se celebrará no pavillón Monte Castelo a partir das 16.00 horas.
CONVITE A PARTICIPAR
Na presentación, que tivo lugar este venres, participaron o alcalde, Alfredo Llano, o concelleiro de deportes, Ramiro Fernández Rey, representantes das distintas entidades colaboradoras e o técnico municipal de deportes, Iván Cao “Lucas”.
Fernández Rey sinala que “penso que conseguimos un programa moi atractivo e queremos invitar a todo o mundo a participar. Non fai falta ser ningún experto nin ter ningún tipo de afinidade por algún deporte, simplemente querer achegarse”, expón. O edil agradeceu a colaboración “da Deputación de Lugo e das entidades patrocinadoras”.