O encoro de Río Covo será o sábado 27 de abril a sede do Campionato Galego Infantil de Piragüismo nas categorías K1 e C1.
A cita, que prevé reunir a máis de 300 palistas de 30 clubs da comunidade, comezará ás 11.00 horas. Tanto o Concello como o Club Deportivo San Ciprián convidan a presenciar o evento nunhas instalacións que empregaba para adestrar o medallista olímpico David Cal.
O alcalde, Alfonso Villares, o edil de deportes, José Ramón Soto, a directiva do Club Deportivo San Ciprián, Cristina Barreira, e o responsable da sección de piragüismo, Iván González, participaron na presentación do campionato xunto a varios adestradores e rapaces que integran este departamento.
RETORNO “IMPORTANTE”
“Levamos moitos meses traballando man a man co Club Deportivo San Ciprián e coa súa sección de piragüismo para poder traer esta regata a Cervo, e cremos que o retorno será importante pola gran cantidade de xente, de familias, que move”, explicou Villares.
