Liderado por unha espléndida Peque, que anotou tres goles, o Pescados Rubén Burela FSF derrotou ao Universidad de Alicante (5-2) no último enfrontamento dos cuartos de final e avanza nunha Copa da Raíña que encheu Vista Alegre de ambiente de fútbol sala.
Logo duns minutos de nervios e imprecisións, o Pescados Rubén Burela FSF meteuse no encontro e tivo tres ocasións case consecutivas nas botas de Jenny, Cami e Lara.
GRAN INICIO
A xogadora viveirense abriu o marcador despois de realizar unha efectiva presión alta xunto con Cami. Ambas as dúas futbolistas do cadro laranxa souberon combinar para habilitar á 10 do Burela, que non perdoou ante a porteira alicantina Jenny.
O gol deulle azos ao Pescados Rubén, que por momentos gustouse con dúas espléndidas xogadas colectivas que Jenny e Lara non foron capaces de culminar, e con detalles individuais como un sombreiro de Dany de antoloxía.
REACCIÓN VISITANTE
Con todo, o 1-0 deixaba o partido aberto e o Universidad de Alicante estirou liñas despois de aguantar a superioridade local sen bicar o chan. No minuto 13 chegou a súa primeira oportunidade, desbaratada por Jozi fronte a Anita. No 14, a porteira brasileira do Burela FSF estivo de novo rápida, desta volta ante Raquel, para afastar o perigo. Segundos despois, a gardameta salvou outro tanto ao desviar un remate cercano de Anita nun saque de esquina.
A CONEXIÓN JOZI-PEQUE OBRA O 2-0
Foron momentos de desconcerto para o Burela, que viu perigar a súa vantaxe e perdeu o dominio do encontro. Unha incerteza que aclararon a propia Jozi e Peque cunha xogada de quilates. A porteira do conxunto burelao encontrou á á-pivote madrileña cun milimétrico pase longo. A 7 do Pescados Rubén FSF demostrou unha vez máis o seu enorme talento elevando sutilmente o balón ante Jenny para acadar o 2-0.
SEGUNDO TEMPO
Con todo, o Universidade de Alicante non se rendeu e no minuto 27 limou diferenzas no electrónico cun tanto de Elenita. Bea Mateos e Peque, nunha xogada similar á do 2-0, na que recibiu da porteira aínda que sen poder superar por alto a Jenny, estiveron a piques de devolver ao Burela FSF os dous goles de vantaxe.
Si atinou a á-pivote madrileña no minuto 34. Bea Mateos recuperou un balón no campo do Universidad de Alicante e deixou á 7 do Pescados Rubén soa ante Jenny. Cunha tranquilidade impropia nun encontro da competición do K. O., Peque axustou o balón ao pao dereito da portería visitante e marcou o 3-1.
SEN ATRANCOS
O tanto do Burela pesou ao conxunto alicantino e deu folgos ás anfitrioas, que ampliaron a súa renda por medio de Bea Mateos segundos despois. Lara, a catro minutos para o desenlace, deu algunha esperanza ao equipo da comunidade valenciana de manterse vivo no torneo.
De aí ao final, o xogo de cinco do conxunto visitante non lle abondou para poñer en atrancos ás discípulas de Julio Delgado e máis Lucas; ao contrario, Peque aínda culminaría unha tarde espléndida co 5-2 nos segundos finais.
FUTSI E ALCORCÓN, OUTROS SEMIFINALISTAS
O vixente campión de Liga, o Futsi Atlético Navalcarnero, pasou apuros para mostrar a súa condición de favorito fronte ao equipo revelación da competición ligueira, o Penya Esplugues (5-4). Ourense Envialia, que eliminou ao Poio Pescamar (1-0), e Alcorcón, que se desfixo na primeira quenda dos cuartos de final do Jimbée Roldán (1-5), son os outros semifinalistas.
Alcorcón-Futsi (17.45 horas) e Burela-Ourense (20.00 horas) serán os enfrontamentos de semifinais do sábado. En xogo un posto na final do domingo, prevista para as 17.00 horas.
