O Burela FS completa a portería con Imanol, campión de Copa co Jaén

O porteiro canario, de 24 anos, tivo pouco protagonismo no cadro andaluz e competirá con Edu por minutos

Imanol, coa camisola do Jaén. AXM

O Pescados Rubén Burela FS alcanzou un acordo co gardameta canario Imanol Chávez Darias (La Gomera, 1993) para a vindeira tempada. O porteiro incorporarase á disciplina do cadro mariñao procede do Jaén Paraíso Interior, equipo co que gañou a Copa de España a pasada tempada.

Imanol competirá por minutos na rotación laranxa co capitán Edu, co que formará un dúo de gardametas de garantías para Juanma Marrube.

Na pasada tempada, o porteiro canario tivo pouco protagonismo na Liga Nacional de Fútbol Sala co Jaén, conxunto no que compartiu vestiario con varios ex integrantes do equipo burelao, como Dani Martín, Chino, Burrito ou o técnico Dani Rodríguez. Coa competencia dun excepcional gardameta como Dídac, Imanol xogou oito partidos en Liga, tres deles como titular, para encaixar un total de 15 goles.

TRAXECTORIA

O novo gardameta do conxunto laranxa formouse no Gomera FS e Gran Canaria Colegios Arenas. Na tempada 2015-16 xogou en Romanía, no KSE Targu Mures. Na campaña 2016-17 militou no FS Zamora, de Segunda B, e no curso 2017-18 estreouse en Primeira División co equipo andaluz.

BLOQUE CASE COMPLETO

Con doce futbolistas, o bloque do Pescados Rubén Burela para a vindeira tempada semella estar practicamente completo. Edu e Imanol serán os porteiros. Pope, Lucho e máis Hélder exercerán como peches. Renato, Vargas, Iago Míguez, Juanfran e Porto cubrirán as ás, mentres que Luisma e Matamoros serán as opcións de Juanma para o posto de pivote.

RESPOSTAR

Please enter your comment!
Please enter your name here