Foz acollerá este domingo, 25 de agosto, a 57 edición da súa Travesía Náutica, que aspira a reunir a arredor de 400 piragüistas de distintos clubs galegos e asturianos.

A travesía Ría de Foz é unha das probas máis lonxevas do calendario deportivo, e inclúe competicións para as modalidades K-1, K-2, C-1 e C-2, nas categorías cadetes, xuvenís, senior e veteranos, todas en distancias de 1.200 metros. Nas competicións participan tanto mulleres como homes.

BERCE DE GRANDES PADEXEIROS

O Club Kayak de Foz, anfitrión do encontro e que conta coa colaboración de Xunta de Galicia e Deputación de Lugo, destaca por ser berce de padexeiros moi destacados como o campión galego, Xoel García –campión de España xuvenil e que foi bronce no Mundial de Bulgaria– ou Iago García -que obtivo a medalla de ouro no campionato galego infantil e que obtivo o terceiro posto na cita nacional-.