O Pescados Rubén Burela FS non puido puntuar na pista dun intratable Movistar Inter (7-2), candidato a todo na presente Liga e que polo de agora conta os seus partidos por vitorias na Liga Nacional de Fútbol Sala (LNFS).
O conxunto burelao chegou ao pavillón Jorge Garbajosa de Torrejón de Ardoz despois de vivir unha semana amarga, coa confirmación da lesión de longa duración dun dos seus piares, o canteirán Iago Míguez, que con toda probabilidade perderase o que resta de tempada.
O cadro madrileño impuxo un forte ritmo desde o inicio e adiantouse no minuto 2, por medio de Pito. Borja mandou ao pau pouco despois. Con todo, o Burela FS non se descompuxo e os discípulos de Juanma Marrube empataron por medio de Renato ao borde do cuarto de hora. O 1-1 premiaba a insistencia do conxunto laranxa, que pouco a pouco meteuse no partido e puxo a proba a Jesús Herrero. Dominaba o equipo mariñao e Pope culminou o remonte antes do descanso.
O Movistar Inter acadou o empate á volta dos vestiarios, cun tanto de Bebe. O conxunto burelao encaixou o 2-2 e optou polo xogo de cinco, sen sorte de cara a portería.
Foron as últimas oportunidades para rabuñar puntos dun orgulloso cadro visitante. No minuto 31, o Pescados Rubén Burela FS encaixou o terceiro, obra de Gadeia; o cuarto do cadro madrileño chegou no 32, por medio de Borja; Ortiz marcou no 33 o 5-2 e acabou nun abrir e pechar de ollos coas posibilidades dos mariñaos.
Solano, con tantos nos minutos 37 e 38, acadou un dobrete que pechou o encontro (7-2).
O VALDEPEÑAS, SEGUINTE RIVAL
O conxunto burelao é o pechacancelas da categoría, cun único punto polo de agora, o que acadou contra o Levante. Os pupilos de Juanma terán a vindeira fin de semana unha nova oportunidade para sumar ante o Viña Albali Valdepeñas, en Vista Alegre.