O Pescados Rubén Burela FSF derrotou ao Majadahonda Afar4 a domicilio (0-2) e segue na segunda posición da Primeira División do fútbol sala español. As ‘guerreiras‘ apoiáronse na solidez defensiva para superar a un cadro madrileño que loita pola permanencia na categoría e que foi un rival combativo.

A pista, que dificultaba a circulación de balón, marcou un partido no que o conxunto que adestran Julio Delgado e máis Lucas tivo problemas para atopar a profundidade. A portuguesa Jenny Santos adiantou ás da Mariña Lucense no minuto 11, pero o Burela FSF non conseguiu ampliar a renda no primeiro acto malia apostar polo xogo de cinco.

Non foi ata o ecuador da segunda metade cando Jenny Lores acadou 0-2, que deu tranquilidade ao equipo laranxa ante un opoñente que, se ben pechou liñas e abortou as ocasións de perigo das burelás, non gozou apenas de oportunidades na portería defendida por Jozi.

AS BURGAS, VINDEIRO RIVAL

O cadro burelao segue á estela do Futsi Atlético Navalcarnero, que nesta décimo oitava xornada saíu vitorioso da pista do Bilbo (0-10). O Ourense Envialia, terceiro clasificado, sumou os tres puntos a domicilio ante o Xaloc Alacant.

A vindeira xornada, o conxunto burelao afrontará un derbi galego, pois recibirá ao Cidade das Burgas, que loita por salvar a categoría.