Foz podería albergar as mellores pistas de atletismo de toda a Mariña. Iso é, cando menos, o que queren os dirixentes do Club focego Ría de Foz que así llelo transmitiron aos representantes da corporación municipal, o alcalde Fran Cajoto e a concelleira de deportes Gema Méndez.

A Directiva do Ría de Foz destaca nun comunicado que o atletismo é un deporte que conta, cada vez cun maior número de seguidores, “cunha base sólida e consolidada na comarca de clubs e atletas“. Neste sentido, suliña di que proba diso son a creación dun maior número de clubs, o aumento exponencial da cifra de licenzas deportivas (tanto a nivel de categorías inferiores como absolutas) e o alto número de eventos deportivos relacionados con esta práctica.

Ría de Foz destaca que, a día de hoxe, os atletas focegos, e por extensión todos os mariñaos, teñen que realizar viaxes de ida e volta de 2h30 de duración, como mínimo, para poder seguir os seus programas de adestramento. Por iso, piden un centro para a práctica deste deporte na Mariña e cren que a vila de Foz é o centro neurálxico da comarca.

Durante a xuntanza, o alcalde Fran Cajoto e a concelleira de deportes Gema Méndez, amosáronse convencidos da necesidade do proxecto e da repercusión positiva que este suporía para a práctica deportiva e a vida económica do concello.