O recurso interposto pola Organización de Produtores Pesqueiros (OPP-7) de Burela en conxunto con 16 compañías afectadas contra o veto da Comisión Europea á pesca de fondo segue o seu curso coa finalización da fase escrita.

A Consellería do Mar, que comparece no procedemento como coadyuvante da parte demandante, presentou un informe no Consello da Xunta no que se detallan as accións realizadas ata o momento.

No documento destácase o traballo realizado polo Goberno galego ante o Tribunal Xeral da Unión Europea (TGUE) para rebater os puntos con incidencia técnica e científicas achegados pola Comisión e o Parlamento europeo para demostrar que o palangre demersal destinado á captura da pescada como especie obxectivo non reúne as condicións sinaladas no regulamento de base, á vez que esta mobilidade de palangre non figura na clasificación establecida sobre a protección dos ecosistemas mariños vulnerables (EMV) de alta fronte aos efectos adversos da utilización de artes de fondo.

Nesta liña, a Xunta apunta que as evidencias achegadas polas institucións comunitarias carecen da debida validez polas súas condicións ao non sinalar nada respecto ao palangre demersal. Aínda que algunhas estaban referidas ao impacto do arrastre de fondo, unha delas mesmo facía unha valoración positiva respecto ao emprego do palangre, que é unha das modalidades de pesca máis selectivas, sustentables e respectuosas co medio mariño, apunta o Executivo autonómico.

Así mesmo, sinala que a controvertida prohibición afecta a 87 caladoiros do Atlántico Nororiental prexudicando a máis dun milleiro de embarcacións, o que representa o 25% da frota galega, 200 de forma directa e outras 946 de artes menores de forma indirecta.

Neste sentido, o impacto socioeconómico desta decisión é outro dos apoios nas alegacións presentadas ante o Alto tribunal, xa que o peso do sector pesqueiro na economía galega ten o seu valor engadido bruto (VAB) 25 veces superior ao da UE e seis veces superior ao do conxunto do Estado español. Tanto é así, apunta a Xunta, que se trata da principal actividade económica nun terzo dos concellos galegos.

Finalizada esta parte do proceso na que as partes presentaron os seus argumentos e as evidencias nas que se apoian as súas posturas no litixio, o TGUE abriu un prazo de tres semanas para solicitar a celebración dunha vista.

Desde a Consellería do Mar sinalan que se traballa en colaboración coa parte demandante na presentación da mencionada solicitude.

MELLORAS DE LONXAS E PORTOS

Por outra banda, a Consellería do Mar destinará no período comprendido entre 2023 e 2025 un total de 10 millóns de euros co obxectivo de modernizar as infraestruturas dos portos, das lonxas ou establecementos autorizados para a primeira venda de produtos pesqueiros e dos lugares de desembarque.

A Xunta indicou que estes apoios plurianuais enmárcanse na orde de axudas que publicará este venres o Diario Oficial de Galicia (DOG) e que forma parte das accións de mellora constante destas instalacións e dos equipamentos portuarios para facilitar o labor diario dos profesionais do mar e impulsar a competitividade e rendibilidade do sector.

Segundo analizou este xoves o Goberno galego na súa reunión semanal, son obxecto destes apoios as actuacións que contribúan á mellora da eficiencia enerxética, da protección do medio ambiente e da seguridade e as condicións de traballo das persoas pescadoras. Ademais, serán subvencionables as iniciativas que favorezan a conservación das descargas de peixe e marisco, a súa rastrexabilidade, a selección ou a etiquetaxe.

Despois de que a primeira convocatoria deste ano incluíse como subvencionables novas actuacións en materia de protección do medio ambiente e para contribuír a reducir a pegada de carbono, a principal novidade das que agora se porán en marcha por primeira vez financiadas polo novo Fondo Europeo Marítimo, de Pesca e Acuicultura (Fempa) está en que se promoverán actuacións nas dársenas e resto de instalacións portuarias e de primeira veda de peixe orientadas a estar mellor preparadas para afrontar as inclemencias meteorolóxicas.

Estas axudas poderán beneficiar a confrarías de pescadores, agrupacións de interese económico do sector pesqueiro, organizacións de produtores de pesca, cooperativas, asociacións profesionais de persoas mariscadoras e rederas.