O Ministerio de Industria e Turismo convocou para este venres, día 15 de decembro, a mesa de seguimento de Alcoa, que se celebrará na sede do Ministerio, en Madrid, despois de que a compañía anunciase que apraza “temporalmente” a aprobación definitiva do proxecto do forno de cocción de ánodos.

A reunión estará presidida pola secretaria de Estado de Industria, Rebeca Torró, e foron convocados representantes da Xunta de Galicia, da empresa e do comité de empresa. Nun comunicado, o Ministerio indica que está “en contacto permanente coa empresa e cos representantes sindicais e segue moi de preto os compromisos adquiridos para seguir avanzando no futuro da empresa”.

A pasada semana, Alcoa comunicou ao persoal a súa decisión de aprazar temporalmente a aprobación definitiva do proxecto do forno de cocción de ánodos, o principal investimento que estaba prevista para o complexo industrial de San Cibrao, en Cervo, cuns 109 millóns de dólares (uns 102 millóns de euros).

Nunha comunicación dirixida aos empregados, a multinacional americana alegou unha “complexa situación financeira”, dado que as plantas de San Cibrao “esperan perdas significativas” para 2024 debido a “unha variedade de factores”, como o prezo da enerxía e os do aluminio e a alúmina. Non entanto, a compañía insistiu en que esta decisión de aprazar o forno de cocción de ánodos “non implica un incumprimento” dos seus compromisos co persoal, entre eles o principal de volver producir aluminio primario desde xaneiro de 2024.

O comité de empresa de Alcoa San Cibrao e a conselleira de Economía, Industria e Innovación, María Jesús Lorenzana, esixiron á compañía que “aclare” a que se refire co anuncio de “aprazar temporalmente” a aprobación definitiva do proxecto do forno de cocción de ánodos, así como que “prazos” prevé para iso.