O comité de empresa de Alcoa San Cibrao manterá este venres un encontro coa Vicepresidenta segunda da Xunta e conselleira de Medio Ambiente, Ángeles Vázquez, para coñecer de primeira man cales foron os pasos seguidos polo Executivo autonómico na tramitación dos parques eólicos chamados a fornecer enerxía á planta de aluminio de Cervo.

Así o confirmou, a través dun comunicado publicado este mércores, a representación dos traballadores da factoría, que avanzou que na citada reunión abordarase tamén o estado de tramitación da autorización solicitada pola empresa para a ampliación do depósito de barros vermellos (DBR) do complexo industrial. Todo iso en plena manobra de rearranque das primeiras cubas de electrolise da factoría que Alcoa puxo en calefacción o luns para tratar de cumprir así cos prazos fixados no acordo de viabilidade asinado entre a multinacional e os traballadores da fábrica.

No comunicado emitido este mércores, o comité informou tamén da solicitude realizada á Secretaría de Industria de abrir unha mesa técnica con persoal das administracións central e autonómica para poder realizar “seguimento administrativo”, detallaron, “dos parques das nosas de PPAs”. Estes acordos de compravenda de enerxía limpa de orixe renovable son fundamentais, explican desde o comité, para o futuro e a viabilidade da fábrica de aluminio primario xa que representan, puntualizaron, “o 25 % da enerxía necesaria con todas as cubas en funcionamento”.