O Matxaku, un buque con porto base en Bermeo, realizou a primeira descarga de bonito da costeira no porto de Burela. O barco vasco trouxo un total de 4.421 quilos do túnido, que alcanzou un prezo medio de 11,39 euros, significativamente superior á das primeiras subastas en anos anteriores.
Cun prezo máximo de 14,10 euros, a primeira subasta na lonxa deixou bo sabor de boca. “O promedio está por riba de anos anteriores, nos que se moveu entre os 7,5 e os 9,5 euros, polo que estamos satisfeitos”, expón Miguel Neira, xerente de Armadores de Burela (Absa), aínda que resalta que a pouca cantidade alixada non permite facer valoracións. “O que nos interesa vén agora, veremos cal é o comportamento da pesquería”, asegura.
Na primeira venta do 2016, o prezo medio de arranque da pesquería foi de 8,12 euros, que aumentou no 2017 aos 8,98 euros. Con todo, nos dous casos alixáronse cantidades superiores; 10.000 quilos no 2016 e 11.200 quilos o ano pasado.
SEN INCIDENCIAS
O armador do buque tapiego Ramon Estefanía, que saíu para o caladoiro das Azores tralas patronais de Burela, sinala que a embarcación cumpriu a primeira semana da costeira sen incidencias. “Estamos pescando entre 50 e 80 quilos diarios”, expón. Por agora, os barcos da cacea non toparon coa presenza dos peláxicos, a principal preocupación da flota.
