Deputados de Unidas Podemos –Rafa Mayoral, Antón Gómez Reino e Yolanda Díaz-, ex representantes na Cámara de En Marea –Ángela Rodríguez-, sindicalistas -entre eles Víctor Ledo, secretario xeral de Comisións Obreiras (CC OO), e o presidente do comité de empresa de Parter-A Coruña, Juan Carlos López Corbacho-, así como traballadores da planta da Coruña -ningún da factoría de San Cibrao– foron imputados por un suposto delito de “atentado contra a autoridade” en relación ao seu comportamento durante unha concentración en Madrid polo futuro das plantas coruñesa e de Avilés, que daquela pertencían a Alcoa.
Nove persoas comparecerán como investigadas ante a titular do xulgado número 25 de Madrid, Raquel Robles, tralos incidentes que ocorreron na concentración dos traballadores fronte ao Congreso dos Deputados, o pasado 28 de marzo, cando un empregado da Coruña foi detido -precisamente é un dos dous investigados- e vivíronse momentos de tensión entre os obreiros e as forzas de seguridade, que cargaron contra os manifestantes.
NINGÚN OBREIRO DE SAN CIBRAO ENTRE OS INVESTIGADOS
Malia que nesa concentración coma noutras posteriores traballadores de San Cibrao desprazáronse a Madrid para estar cos seus compañeiros, ningún dos operarios da fábrica sancibrense está entre os nove investigados, segundo confirmou o delegado de CC OO na fábrica de Cervo, José Antonio Zan.
CC OO E UNIDAS PODEMOS FALAN DE “PERSECUCIÓN”
CCOO, que lamentou a “persecución” ás persoas denunciadas, “que non opuxeron resistencia ningunha”, anunciou protestas para os próximos días, cadrando coas comparecencias xudiciais. Serán o 24 de setembro, ás 11.00, diante dos xulgados da Coruña, e o 8 de outubro, tamén ás 11.00, diante dos xulgados de Ferrol. O sindicato insta ao Goberno que saia das urnas o 10 de novembro a comprometerse a derrogar a coñecida como “Lei Mordaza“.
Unidas Podemos, pola súa banda, acusou ao ministro do Interior en Funcións, Fernando Grande-Marlaska de “reactivar as cloacas do Estado”. “Parécenos que este caso novo de policía política, un ataque ao sistema democrático inaceptable do que (Grande-Marlaska) debe render contas”, manifestou Mayoral, que lembrou que pola súa condición de deputado só pode ser chamado a declarar polo Tribunal Supremo.
O VENRES, NOVO CORTE DA N-642
O comité de empresa de Alcoa San Cibrao lembrou este xoves que o vindeiro venres o persoal cortará de novo a N-642 á altura do Castelo, de 14.00 a 14.30 horas, para esixir que o Goberno central “active canto antes” as medidas que “revertan a deriva” que tomou Alcoa co recorte produtivo do 11% na planta de aluminio, parando 32 cubas.
