O presidente da Deputación de Lugo, o socialista José Tomé, afeou este martes á Xunta de Galicia que “non” teña “política industrial” coa que facer fronte ás crises das plantas de Alcoa e Endesa. “Onde está o plan industrial alternativo da Xunta para Ferrolterra, para As Pontes, e que incida na Mariña de Lugo e na Terra Chá?”, preguntouse.

En declaracións aos medios tras un encontro coa alcaldesa de Lugo, Lara Méndez, Tomé fixo referencia a que precisamente “a produción industrial está a caer en Galicia un 6,3 por cento, aguantando grazas a grandes empresas como Citröen ou Zara“.

“Pero onde está a política industrial da Xunta? Porque no Estatuto de Autonomía de Galicia, creo que é o artigo 30, recolle claramente que a política industrial, salvo hidrocarburos ou temas nucleares e demais é competencia exclusiva da comunidade autónoma”, sentenciou.

“Onde está o plan industrial da Xunta de Galicia, ten algún plan? Polo que se ve, para Galicia non e para Lugo e para a comarca de Ferrolterra e As Pontes tampouco”, criticou.

No entanto, Tomé afanouse en deixar claro, despois de cuestionar ao Goberno galego, que “iso non quere dicir” que non lle diga “ao Ministerio que ten que ocuparse e preocuparse desa zona”.

A DECLARACIÓN INSTITUCIONAL, “MÁIS ÚTIL”

O presidente provincial aproveitou para explicar, sobre o intercambio de reproches entre administracións, que “ademais andan facendo espectáculos, presentando mocións que non van a ningún lado ou pedindo dimisións de ministros. Nós tamén podiamos pedir a dimisión do presidente da Xunta pero como somos máis responsables non o facemos”, engadiu.

“Nós apostamos claramente polo que se decidiu na reunión de alcaldes (este luns), que decidiron que era moito máis útil facer unha declaración institucional de todos e facemos máis forza todos unidos que andar cunha moción dispersa para pedir dimisións”, concluíu Tomé.