A merluza do pincho de Celeiro é Friend of the Sea ao 100%

Saborosa, nutritiva e tamén respectuosa co medio ambiente. Toda a merluza do pincho de Celeiro é Friend of The Sea (FOS). Os 22 palangreiros da flota de Gran Sol celeiresa teñen xa o certificado de sustentabilidade que concede a ONG do mesmo nome.

O selo supón o recoñecemento de que as embarcacións do palangre de Celeiro, que atrapan a pescada ao xeito tradicional, con anzol, cumpren unha serie de requisitos. Entre outras condicións, FOS esixe que non haxa sobrepesca, segundo o acordo coa Food Agriculture Organization (FAO) das Nacións Unidas; que a pesca non teña un impacto relevante nos fondos mariños; que se cumpra a legalidade vixente e non se capturen especies ameazadas; que o número de descartes sexa inferior ao 8%; que a flota faga unha eficiente xestión de residuos e que demostre unha responsabilidade social.

o selo PREMIA un reducido porcentaxe de descartes ou que non se capturen especies ameazadas

A certificación premia un proxecto iniciado dous anos atrás. Puerto de Celeiro trazou no 2016 un plan plurianual para que a flota do pincho ao completo obtivese o selo de sustentabilidade. No primeiro exercicio obtiveron o certificado oito barcos e as restantes embarcacións acadaron o distintivo de FOS no pasado mes de abril. Os buques emprenderon varios protocolos, como a utilización de tori lines para evitar a captura accidental de aves ou a correcta xestión dos residuos plásticos no mar. A partir de agora, a ONG someterá aos palangreiros a unha auditoría anual para conservar o ecoetiquetado.

“De seleccionar a merluza do pincho de Celeiro, os minoristas, restaurantes e consumidores apoiarán, á súa vez, a pesca sostible e a conservación do hábitat mariño”, asegura o fundador de FOS, Paolo Bray, que acudiu hoxe á primera subasta coa totalidade da pescada etiquetada co selo da ONG. Tamén participaron no acto a Conselleira do Mar, Rosa Quintana, e a alcaldesa de Viveiro, María Loureiro.

O director adxunto de Puerto de Celeiro, Eduardo Míguez, explica que “valoramos varias opcións á procura dun compañeiro de viaxe e decidimos que FOS era a que cumpría todos os requisitos cos que queremos que se identifique á merluza de Celeiro”. Míguez sinala que outros selos de sustentabilidade “permiten, por exemplo, un porcentaxe de descartes elevado cando o noso está por debaixo do 4%”.

A PESCADA SUPÓN O 85% DO VOLUME DE NEGOCIO DE PUERTO DE CELEIRO, CUNHAS VENTAS DE 11.000 TONELADAS ANUAIS

DISTINTIVOS DE CALIDADE

O certificado de sustentabilidade de Friend of The Sea súmase aos distintivos de calidade de Galicia Calidade e Carrefour Selección, cos que xa conta a merluza do pincho de Celeiro. Tamén recibiu o premio Alimentos de España 2017, que concede o Ministerio de Agricultura e Pesca, Alimentación e Medio Ambiente. A pescada supón para Puerto de Celeiro, segundo Míguez, “en torno ao 85% do noso volume de negocio, cunhas ventas de 11.000 toneladas anuais”. Cunha media de 15 tripulantes por embarcación, unhas 330 persoas traballan na flota do palangre celeiresa.