Os alcaldes de Burela, o socialista Alfredo Llano, e de Cervo, o popular Alfonso Villares, animaron á poboación da Mariña Lucense a asistir á concentración que se celebrará este xoves na vila burelá (Praza do Concello, 20.30 horas) para reivindicar un abaratamento da enerxía eléctrica ante a situación da planta de aluminio de Alcoa en San Cibrao, que a multinacional ve “inviable” sen unha rebaixa do prezo da luz.
“É unha boa oportunidade para mostrar o noso compromiso coa defensa dos postos de traballo da factoría de Alcoa. Agardamos que o respaldo sexa maioritario”, expuxo o rexedor burelao.
Pola súa banda, Villares enviou un artigo de opinión no que afirma que o aluminio fabricado na Mariña Lucense “sempre necesitou dun empurrón ou dunha colaboración estatal para o seu funcionamento”. Así, cifra en “cen millóns” a cantidade que Alcoa precisa para “asegurar a súa viabilidade”.
O alcalde cervense argumenta que eses cen millóns que reclama ao Goberno en funcións para a multinacional “reportarán outros cen millóns en soldos a traballadores directos e indirectos, por non falar de 250 millóns de euros que supón a súa repercusión noutros sectores comerciais e industriais asociados“.
Así, considera que se trata dunha cuestión de vontade política. “Non é cuestión de poder, é de querer“, sostén. Podes ler o artigo completo nesta ligazón. Carta Alcoa, querer é poder
A asociación de veciños Cruz da Venta ou o CD Pescados Rubén Burela tamén mostraron o seu apoio á protesta, así como numerosos comercios de Burela, que pecharán antes para respaldar a concentración. O Concello de Cervo reducirá o horario da piscina municipal e das escolas deportivas co mesmo motivo.
TEMOR POLO PLAN DE AXUSTE ANUNCIADO
O comité de Alcoa San Cibrao asegurou o pasado xoves que “os ánimos están polo chan” tralo anuncio por parte da compañía estadounidense de que acometerá un plan de axuste para cinco anos no que se inclúe unha redución da produción de alúmina e aluminio, coa posibilidade de pechar plantas e reducir a produción noutras instalacións.
Os sindicatos reclaman ao Goberno central en funcións que mostre o borrador do estatuto das empresas electrointensivas, tal e como lles comprometeu a ministra de Industria, Reyes Maroto, á que piden unha reunión “urxente”.
