Un total de 1.145 traballadores do complexo industrial de Alcoa en San Cibrao están chamados a votar desde este luns nas eleccións sindicais da fábrica, das que sairá o décimo sétimo comité de empresa da factoría sancibrense nas súas catro décadas de historia.
O censo total componse de 825 votantes no colexio de especialistas, que elexirán a 17 representantes, e de 320 no de técnicos, que escollerán a seis delegados. Dos 1.145 empregados, 964 son traballadores en activo e 181 teñen contratos de relevo, segundo precisou o comité de empresa.
O persoal de Alcoa poderá elixir entre tres candidaturas: a da CIG, liderada polo presidente do comité durante a última lexislatura, Xosé Paleo; a de CC OO, comandada de novo por José Antonio Zan; e a de UXT, a única que renova cabeza de lista, con Jorge Fernández “Castañón” á fronte.
Os comicios comezaron este luns coa votación das quendas XN, A, E e C de aluminio, e XN, E, C e B de alúmina. O horario será de 10.00 a 18.00 horas e de 21.30 horas a 1.30.
O día 6 está previsto que voten as quendas XN e D de aluminio e XN e A de alúmina, en horario matinal (de 10.00 a 14.00 horas).
Finalmente, o 8 de novembro, venres, serán os obreiros das tandas XN e B de aluminio e XN e D de alúmina, de 8.30 a 12.30 horas, os que emitan o seu sufraxio. Segundo expuxo o comité en funcións, ese mesmo día saberanse os resultados.
CONCORREN TRES SINDICATOS: CIG, UXT E CC OO
Nos pasados comicios deuse unha situación de empate entre CIG e UXT -sete representantes-, por seis de CC OO -que decidiu co seu apoio á central nacionalista-, dous de CSIF e un de APC. Estas dúas forzas non concorren ás eleccións, ao igual que USO, sen representación en 2015.
A PARADA DE CUBAS E O PLAN DE AXUSTE ANUNCIADO PLANEAN SOBRE ALUMINIO
As eleccións sindicais en Alcoa San Cibrao chegan nun momento convulso, cunha parada de 32 cubas na planta de aluminio, que a multinacional considera inviable sen un abaratamento da enerxía. Ademais, a compañía radicada en Pittsburgh (Estados Unidos) anunciou un plan de axuste para un prazo de cinco anos que contempla a redución da produción e o peche de plantas, o que fai temer polo emprego aos traballadores.
Os tres candidatos, de feito, priorizaron visibilizar a comprometida situación da fábrica sen un novo marco enerxético que rebaixe e estabilice o prezo da electricidade sobre a negociación do novo convenio, que será outra das grandes tarefas pendentes do novo comité.
