EFE. O Parlamento galego aprobou este mércores unha proposición non de lei (PNL) do Partido Popular de Galicia (PPdeG) a través da cal apoia a proposta de estatuto para os consumidores electrointensivos elaborada pola Xunta e insta ao Goberno central a asumir estes postulados tralo anuncio do preacordo entre PSOE e Unidas Podemos.
A iniciativa saíu adiante sen votos en contra e coas únicas abstencións do PSdeG-PSOE e do Grupo Mixto, que non frearon a tramitación dunha proposta que reclama ao Executivo do Estado que “adopte todas as medidas previstas de xeito inmediato” para atender a situación “crítica” dos 5.000 empregos dependentes desta industria en Galicia, especialmente aqueles relacionados coa actividade da planta de Alcoa en San Cibrao.
O grupo popular optou por rexistrar esta proposición non de lei pola vía de urxencia dada a “necesidade de aportar certeza a un sector industrial fundamental para o tecido económico galego”, que -advirten- “necesita dun marco estable para garantir un prezo competitivo da enerxía coa que traballa”.
A portavoz de Industria do PPdeG no Lexislativo galego, Marta Nóvoa, manifestou que os traballadores de Alcoa están “sumamente preocupados ante a falta de resposta dun Goberno que, tras un ano da orixe do conflito, non aportou ningunha solución” para un sector no que a enerxía pode supoñer ata o 40% dos custos de produción.
“A situación é moi grave”, insistiu Nóvoa, que censurou a “inacción” do Executivo socialista e que cuestionou que agora pretendan incorporar como socios para crear un novo Executivo “aos que queren pechar as empresas galegas”, en alusión a Unidas Podemos.
Con todo, pese ás críticas, o Grupo Común da Esquerda apoiou a iniciativa dos populares, do mesmo xeito que o BNG, aínda que ambas formacións cuestionaron a actitude e a falta de medidas do Goberno galego.
“UN CORTA-PEGA” QUE SE ESQUECE “TRALA CAMPAÑA”, AFIRMA O PSOE
Nunha liña similar discorreron as intervencións do Grupo Mixto e do PSdeG-PSOE, cuxa deputada Patricia Otero, sostivo que a Xunta “non fixo nada polo mantemento do emprego de Alcoa San Cibrao” e que ata se dedicou a “poñer paus nas rodas do Goberno socialista”.
“Mostran unha falta tremenda de lealdade institucional”, reprochoulle Otero aos populares, a quen recordou que a Xunta “tamén ten competencias en política industrial” e ante os que asegurou que “será un Goberno presidido por Pedro Sánchez o que saque a Alcoa da situación na que se atopa”.
Sobre o estatuto proposto, comentou que é “un copia e pega de medidas das que se acordan en campaña electoral” no PP pero que non se comprometen a aplicar logo, como demostra a recente experiencia de Mariano Rajoy á fronte do Goberno do Estado.
