Os voceiros dos tres grupos da corporación municipal de Lourenzá –Manuel Arango (PSdeG-PSOE), Francisco Javier Rodríguez (PP) e Enrique Rocha (BNG) asinaron un acordo no que solicitan que a Deputación Provincial de Lugo, a Xunta de Galicia e os grupos das tres forzas políticas no Parlamento galego medien na procura dun plan de viabilidade para a empresa Muebles Hermida, “poñendo por diante a condición irrenunciable do pago dos salarios atrasados”.

No escrito indican tamén que a corporación municipal ponse “ó servizo de todas as persoas implicadas na crise de Muebles Hermida coa mellor das predisposicións para entre todos acadar a mellor das solucións posibles. Por iso solicitamos unha reunión entre a dirección da empresa, os delegados dos traballadores e os grupos políticos para abordar esta grave crise”.

“EMERXENCIA SOCIAL”

Ademais explican que “Lourenzá está a pasar por uns momentos duros ao ter case un cento de familias sen cobrar os seus salarios desde hai xa catro meses. A situación é de pre emerxencia social e non podemos pasar e mirar para outro lado”, conclúen.

A dirección de Muebles Hermida anunciou o pasado xoves nunha reunión co persoal que tomará unha decisión entre finais desta semana e principios da seguinte. A empresa, que asegura contar con varias ofertas, debátese entre a venta e o concurso de acredores.