O BNG trasladou ao Congreso dos Deputados a situación da liña de ferrocarril Ferrol–Ribadeo, sobre todo polo “perigo” que deriva das condicións nas que se atopa o tramo como mostra, expón a formación nacionalista, o accidente da noite do 19 a 20 de febreiro, á altura do Barqueiro (Mañón) por mor dun desprendimiento de terra.

O deputado do partido frontista, Néstor Rego, insistiu en que estes accidentes, preto dun milleiro o pasado ano, teñen unha “relación directa” coa redución de persoal, a supresión de servizos e o abandono do mantemento das infraestruturas, como o material rodante, as estacións ou os problemas para a expedición de billetes.

Por iso, trasladou a súa “preocupación” polos accidentes e problemas que se están producindo, sobre todo o último caso rexistrado en O Barqueiro provocado por un desprendimiento de terras no tramo de Viveiro a Ortigueira, con tres persoas feridas, dous traballadores -o maquinista e a interventora- e un dos sete pasaxeiros.

Malia que os usuarios e tamén veciños da Mariña Lucense e Ortegal levan anos pedindo un mellor mantemento das vías, Adif asegura que os descarrilamentos coma o do convoi do Barqueiro son froito das choivas e da orografía e nega que haxa desleixo á hora de coidar a infraestrutura.

O accidente, para Rego, “pon de manifesto a situación de deterioro da liña ferroviaria e, sobre todo, a necesidade de actuacións urxentes para que este tipo de situacións non se volvan a producir”, insistiu, para esixir decisións políticas “claras”, con investimentos e prazos, “máis aló de anuncios baleiros de contido”, e asegurar a modernización da liña “en condicións de calidade e operatividade”.