EFE. O presidente da Xunta de Galicia, Alberto Núñez Feijóo, volveu esixir de novo solucións para as empresas electrointensivas posto que, pola contra, en Galicia haberá un “coronavirus industrial” porque ao anuncio de peche da fábrica de Endesa nas Pontes e á ameaza que realizou Alcoa sobre a planta de aluminio, que ve inviable sen electricidade máis barata, “seguiranlles outros”.
O presidente do Executivo galego, que se reuniu o mércores co grupo de traballo conformado nas Pontes (A Coruña) tralo anuncio de peche da central térmica de Endesa, denunciou a “situación tráxica” que atravesan as familias da zona e que dependen económicamente da factoría.
Feijóo recordou na roda de prensa posterior á reunión co seu Goberno que hai “decenas de familias que levan sen cobrar moito tempo” e afrontan unha “situación que é tráxica porque ninguén lles di nada” pese a que antes das eleccións xerais do 10 de novembro se lles prometera unha solución que non chega xa que, ao seu xuízo, “o problema persiste con maior intensidade”.
En base a iso, o presidente da Xunta volveu a esixir que o “Goberno bipartito” de PSOE e Podemos presente medidas que vaian máis aló do “insuficiente” estatuto electrointensivo porque se non o fan agora, en precampaña electoral en Galicia, tampouco o farán máis adiante. “Se non se arranxa agora, non se arranxará nunca”, prognosticou o máximo mandatario autonómico.
Feijóo incidiu na urxencia das actuacións para evitar que se acabe por “sepultar” a industria galega xa que as ameazas de peche estanse “estendendo. Isto si que é o coronavirus industrial”, dixo logo de responder a unha pregunta sobre esta enfermidade.
ERTE EN CELSA ATLANTIC
A este fío, apuntou que a empresa Celsa Atlantic da Laracha anunciou un Expediente de Regulación de Emprego Temporal (Erte) co que “pon na rúa” a 150 traballadores.
“Isto vai en serio, non é unha confrontación como din certos líderes políticos”, asegurou Núñez Feijóo, que recordou o perigo que existe “para familias e comarcas enteiras” pese a que o Goberno central “non considere prioritario” este problema.
A OPOSICIÓN ATRIBÚELLE A PERDA DE 22.000 EMPREGOS
A crise industrial de Galicia protagonizou na lexislatura que está a piques de rematar un pleno no Parlamento galego. A oposición coincidiu en acusar a Feijóo de “covarde” e “escapista” ante unha perda de empregos na industria que, segundo o Grupo Común da Esquerda, supera os 22.000 postos de traballo desde que preside a Xunta de Galicia, no período 2009-2020.
