Os Concellos de Cervo e Xove fletarán de novo autobuses para as concentracións para reclamar ao Goberno central un abaratamento da enerxía eléctrica que Alcoa reclama para non pechar a fábrica de aluminio de San Cibrao. Despois de que os executivos locais dos municipios veciños, onde se ubica o complexo industrial da multinacional, habilitaran autocares para que a veciñanza asistise á marcha de Lugo, custearán o desprazamento para acudir á concentración do mércores 11, na Coruña.
Os tres sindicatos maioritarios a nivel galego -CC OO, UGT e CIG- convocan a protesta, ante a Delegación do Goberno, para reclamar un futuro para a industria electrointensiva. A concentración será ás 11.00 horas, e os buses sairán ás 8.30 horas de Cervo (casa do mar de San Cibrao, cunha parada 15 minutos despois na capital municipal), e de Xove (centro cívico). A volta será ao mediodía.
Os alcaldes de Cervo e Xove, os populares Alfonso Villares e Demetrio Salgueiro, cualifican a situación de aluminio de “momento crítico para a comarca”, e urxen ao Goberno central para que “teña en conta as alegacións ao estatuto do consumidor electrointensivo e o modifique para establecer un prezo da enerxía xusto que permita seguir producindo en San Cibrao”. Diso dependen, argumentan, “infinitos servizos públicos, as administracións e outras moitas empresas da contorna”.
Por agora, o Executivo central non dá prazos sobre a aprobación do documento -tampouco se se tramitará como Real Decreto ou deberá ter a luz verde do Congreso dos Deputados– nin sobre se terá en conta as reclamacións presentadas por sindicatos, partidos e os Gobernos autonómicos de Galicia, Asturias e Cantabria.
CxG INSTA AOS ALCALDES E DEPUTADOS SOCIALISTAS A QUE “PIDAN A BAIXA” DO PARTIDO
O candidato de Compromiso por Galicia (CxG) ao Parlamento de Galicia na provincia de Lugo, Juan Carlos Piñeiro Docampo, esixiu aos alcaldes socialistas na Mariña Lucense e aos doce deputados galegos de PSOE e Unidas Podemos no Congreso que “soliciten a baixa” nos partidos para presionar de cara a “unha solución” para a “falta de seguridade xurídica e de costes” que ten Alcoa.
“O PSOE na súa estratexia política ten planeado un xiro cara a política ecolóxica. Os socialdemócratas de Alemaña e Francia foron vítimas dos partidos Verdes. Pedro Sánchez ten decidido a descarbonización e ser o líder europeo das políticas verdes, pouco lle importa Galicia, somos poucos votantes” dixo Piñeiro.
“España quere optar aos fondos de Green Deal da Unión Europea, e apoiamos esa política, pero ten que facerse unha transición xusta sen que pague Galicia todo a peaxe. E a Mariña especialmente”, argumentou para xustificar a súa solicitude.
