InicioEconomíaA UXT acusa a Sargadelos de impulsar unha recollida de sinaturas para...

A UXT acusa a Sargadelos de impulsar unha recollida de sinaturas para forzar a demisión da súa delegada

O sindicato solicitará a tutela xudicial ao entender que o conselleiro delegado "chantaxea e coacciona" aos traballadores ao "condicionar os postos de traballo a asinar o documento"

Publicada o

- Advertisement -

A Unión Xeral de Traballadores (UXT) denuncia que o conselleiro delegado de Sargadelos, Segismundo García, elaborou un documento entregado aos empregados no que se compromete a deixar sen efecto os despedimentos executados na fábrica de Cervo e non cesar a ningún outro operario se os propios obreiros esixen, coa súa sinatura, a demisión da representante do sindicato, Rogelia Mariña.

Para a UXT, esta práctica é unha “clara chantaxe e coacción”. O coordinador de servizos xurídicos do sindicato, Pedro Blanco, entende que a medida da empresa constitúe “acoso laboral”, ao supeditar a anulación dos despedimentos á marcha da sindicalista. Por iso, a organización sindical solicitará a tutela xudicial e utilizará “a vía penal se fose necesario”, ante os “ataques directos e persoais contra a dignidade da nosa afiliada, que foi elixida polas súas compañeiras durante máis de 30 anos”.

a uxt denuncia que se dá “acoso laboral” ao supeditar a anulación dos despedimentos á marcha da súa representante

Fontes do sindicato aseguran que a intención da empresa é “dividir ao cadro de persoal”, que non conta con comité de empresa. As últimas eleccións sindicais realizáronse cando traballaban unhas 50 obreiras na fábrica de Sargadelos, cando no último ano e medio o grupo empresarial incrementou ata cen o número de operarias en Cervo. Actualmente, hai dúas representantes sindicais

Consultado sobre esta denuncia, o conselleiro delegado de Sargadelos, Segismundo García, declinou facer declaracións ao respecto e reiterou a súa intención de “pechar a fábrica” de continuar a “presión sindical” sobre a directiva.

o conselleiro delegado declina confirmar ou desmentir a acusación da uxt

DESPEDIMENTOS

Blanco sinala que ata o de agora ten noticia de que se executaron “oito despedimentos” o pasado venres. As persoas despedidas foron as últimas en entrar a traballar na fábrica, con independencia da sección que ocupasen, pois unha delas -segundo fontes sindicais- exercía como deseñadora. A xustificación destes cesamentos baséase en “medidas disciplinarias, por baixo rendemento”, expón, e nega que exista unha “causa obxectiva” dos mesmos.

A UXT solicitou á dirección da empresa que presente aos delegados sindicais documentación precisa sobre os despedimentos, tanto os realizados como os anunciados, un total de 49. Desde a directiva da Unión Comarcal de Comisións Obreiras (CC. OO.) na Mariña, o outro sindicato con representación na fábrica, sinalan que lles foi imposible contactar co conselleiro delegado da firma e que lles “falta información” para tomar medidas ao respecto, de xeito que valorarán a situación “nos vindeiros días”.

O ALCALDE CHAMA “AO ENTENDEMENTO”

Segundo informou Galicia Confidencial, o alcalde de Cervo, o popular Alfonso Villares, emprazou aos donos da fábrica de cerámica e aos representantes dos traballadores a buscar “un entendemento” para “evitar que se leven a cabo as formulacións que se fixeron desde a dirección da empresa”, en alusión ao anuncio de Sargadelos de que despediría a 49 operarios, case a metade do seu cadro de persoal. Isto suporía, segundo o propio conselleiro delegado, quedar “sen obreiros suficientes” para atender a demanda

Villares sinala que “é unha situación moi preocupante para Cervo”, aínda que lembra que se trata “dunha empresa privada, que non pública, e diso hai que ser conscientes”. Respecto diso, lembrou que a compañía xa “pasou por un momento crítico hai uns anos e saíu adiante pola achega de capital do socio maioritario“. Sargadelos saíu en 2016 dun concurso de acredores no que entrou de forma voluntaria en 2014.

ÚLTIMAS

Erika Gomes Mendes: “Fixen un traballo para saber se os caboverdianos coñecían algo de Galicia antes de vir”

-Erika, cando chegaches a Burela desde o teu país? Cheguei a Burela en 2017 e...

‘A Sacabeira’ celebrará o Día de Rosalía o 25 de febreiro en Sargadelos

O vindeiro 25 de febreiro, no Café Bar Cultural A Sacabeira, a ACR Fervenza  de Sargadelos celebra...

Denuncian que o Hospital de Burela queda só cun cardiólogo

A CIG-Saúde da Mariña denuncia que o hospital queda cun só especialista en cardioloxía...

Trabada solicita unha subvención para as cubertas do CEIP Celso Currás

O Concello de Trabada solicitou unha subvención á Xunta de Galicia para a mellora...