Logo do anuncio de Alcoa, o pasado xoves, de que renuncia a reparar e poñer en marcha as cubas de electrolise da planta de aluminio de San Cibrao que cheguen o final da súa vida útil, a plataforma que aglutina a representación sindical nas empresas auxiliares do complexo industrial de Cervo, as máis afectadas polo recorte, instan aos seus compañeiros a non facer horas extras.
A coordinadora, da que forman parte os delegados sindicais de 21 empresas, para preto de 1.000 traballadores representados, advirte de que se trata “dunha primeira medida” ante a decisión de Alcoa, posto que “serán máis se a situación se agrava”.
“Sería unha falta de empatía por parte dos traballadores seguir facendo horas extraordinarias para facer medrar o salario cando hai case un cento de compañeiros que están a piques de perder o seu posto de traballo”, razoa a plataforma.
Segundo advertira nun primeiro momento a plataforma, prescindir das tarefas de brascaxe afectaría directamente a uns 50 traballadores de tres auxiliares de Alcoa, Reymogasa -uns 25-, Cyrgasa -trece- e Rodabell. Con todo, os sindicatos destas tres firmas expuxeron que o número de obreiros afectados será maior debido ao forte impacto que suporá a perda deste contrato, pola contía económica e tamén pola estabilidade que ofrecía a estas empresas, ao ser un ingreso fixo.
21 EMPRESAS E CASE 1.000 EMPREGOS
Deste xeito, desde a plataforma piden “a solidaridade” e “o apoio” á súa solicitude aos traballadores de Reymogasa, Cotelsa, Cyrgasa, Terpil, Jofrasa, Noguera, Industrias Xove, Pasek, Garmil, Maesa e Isotrón, Rodabell, Mecanizados Rodabell, Montaxes Rodabell, Saur Xove, Talleres Noguera, Mayco, Sertosa Norte, Dominium, Daorje, Mantenimientos Mafer e Recalnor.
A coordinadora matiza que “ata o de agora ningunha empresa das afectadas propuxo EREs, ERTEs ou despedimentos, mais se eses anuncios chegan, as medidas irán a máis e non vacilaremos na intención de defender todos e cada un dos nosos postos de traballo”, asegura. “A situación social na que vivimos por mor da crise do Covid-19 é moi complexa, máis estes delegados non permitirán que se confinen os dereitos da clase traballadora e se eliminen os seus empregos”, expón a plataforma.
