Representantes da Asociación de Empresas de Gran Consumo Eléctrico (AEGE) reuníronse esta tarde co titular de Economía, Emprego e Industria da Xunta de Galicia, Francisco Conde, con quen coincidiron na “urxente necesidade” dun prezo eléctrico competitivo para ofrecer unha solución tanto a esta industria como aos milleiros de empregos asociados en Galicia.
Segundo informou o Goberno galego nun comunicado, tanto a Administración autonómica como o tecido empresarial esperan que o Goberno dea unha solución definitiva na mesa de Alcoa San Cibrao convocada para mañá, “xa que logo de ano e medio a prioridade sen resolver segue sendo a mesma: fixar un prezo eléctrico estable que permita á industria electrointensiva galega competir en igualdade de condicións co resto de Europa e evite o peche da única planta que actualmente produce aluminio primario en España”.
Por iso, desde a Xunta e o sector se incide na urxencia de aprobar un estatuto electrointensivo que aporte este marco enerxético “e no que se teñan en conta as alegacións presentadas en Galicia e que foron consensuadas coa industria galega e cos gobernos de Asturias e Cantabria“.
PIDE UN PLAN DE INVESTIMENTOS ESPECÍFICO PARA ALCOA
Tamén é necesario, engade o Goberno galego na nota, “un plan de investimentos específico que permita acceder aos novos fondos europeos e que dea viabilidade e garantías de futuro a longo prazo a esta industria”.
Recorda ademais a Xunta que “aínda está pendente de convocar a poxa de interrompibilidade para o segundo semestre do ano”.
O GOBERNO TEN “OS INSTRUMENTOS NECESARIOS”, AFIRMA
Conde considera así que “hai marxe de actuación” e que o Goberno “ten sobre a mesa os instrumentos necesarios para revertir a situación”.
O comité de empresa de San Cibrao solicitara ao conselleiro Conde nunha entrevista telemática que as Administracións central e autonómica e os sindicatos “remaran na mesma dirección” para procurar unha solución á planta de aluminio ante a “falta de vontade” de Alcoa, unha idea na que o presidente do organismo de representación dos traballadores, José Antonio Zan, insistiu na mañá deste luns. O sindicalista pediu “que non se tiren as pedras do tellado uns aos outros, porque á fin quen quedaremos sen lousado seremos nós”.
