Os traballadores de Alcoa San Cibrao retomaron este martes as protestas ante o despedimento colectivo anunciado pola multinacional na planta de aluminio, que afectaría a 534 obreiros da factoría e a máis de 400 das empresas auxiliares.

Os obreiros cortaron a entrada ao complexo industrial de Cervo con barricadas de pneumáticos, nunha xornada que se presume importante para atopar unha alternativa ao Expediente de Regulación de Emprego (ERE) feito público pola compañía, dado que se reúne na Coruña (18.30 horas, Delegación do Goberno) a mesa multilateral polo futuro de Alcoa San Cibrao, con presenza da empresa, dos sindicatos, do Executivo central e da Xunta de Galicia.