O presidente da Xunta de Galicia, o popular Alberto Núñez Feijóo, asegurou que “lamentablemente” aínda non recibiu resposta do Goberno central, tras enviar na pasada xornada unha carta a varios dos seus membros, incluído o presidente Pedro Sánchez, para urxir a poxa de interrompibilidade do segundo semestre, que entende como “fundamental” para as electrointensivas e a continuidade da planta de aluminio de Alcoa en Cervo, onde a multinacional presentou un Expediente de Regulación de Emprego (ERE) con ata 534 despedimentos na factoría e outros 400 en auxiliares.
“A PETICIÓN DE AXUDA FOI SUFICIENTEMENTE EXPLÍCITA”
Feijóo afirmara o pasado mércores que ía remitir esta misiva á vicepresidenta cuarta e ministra para a Transición Ecolóxica, Teresa Ribera, e á súa homóloga en Industria, Reyes Maroto. Preguntado este venres, dixo que a carta se enviou na pasada xornada e que era “o suficientemente explícita pedindo axuda” e demandando que “non deixe, por acción ou omisión, pechar unha industria” sen a que non podería “subsistir” a Mariña Lucense e que é chave para o resto de Galicia e España, como única planta de produción de aluminio primario.
O 1 DE XULLO ACABA A VIXENCIA DAS ACTUAIS CONDICIÓNS
Tras remarcar que non recibiu resposta, volveu a urxir a poxa de interrompibilidade do segundo semestre, que “xa debera estar publicada” porque “ten que entrar en vigor o próximo 1 de xullo“.
INSISTE EN RECLAMAR BLOQUES DE 90 MW PARA “DAR FACILIDADES” ÁS ELECTROINTENSIVAS
Feijóo volveu pedir unha subasta con condicións a medida para Alcoa. “Desexamos que esa poxa se faga nas próximas horas, que saian bloques de 90 MW para dar facilidades ás empresas electrointensivas e que se desbloquee unha situación absolutamente alarmante e que xera unha enorme tensión social na Mariña pola inacción desde o punto da tarifa eléctrica e da interrompibilidade, e a falta dese tan manoseado ás veces estatuto electrointensivo“, sostivo, para concluír que o Goberno “fala del desde hai ano e medio e aínda non é coñecido nin o borrador”.
